Рӯзи иди саиди Фитр дар Тоҷикистон муайян гардид

Рӯзи иди саиди Фитр дар Тоҷикистон панҷшанбе, 13 май муайян гардид. Дар ин бора имрӯз Шӯрои уламои Маркази исломии Тоҷикистон қарори дахлдор қабул намуд.

Тавре аз Шӯрои уламои Маркази исломии Тоҷикистон  ба АМИТ «Ховар» хабар доданд, тибқи қарори мазкур имомхатибон вазифадор карда шудаанд, ки барои расонидани кумаки моддӣ ба мӯҳтоҷону ниёзмандон, инчунин пешгирии исрофкориҳо дар рӯзҳои ид ва сарфаву сариштакорӣ мардумро ҷалб намуда, худашон намунаи ибрати дигарон бошанд.

Ҳамчунин дар қарор омадааст, ки шахсоне, ки молашон ба ҳисоб расидааст, метавонанд закоти худро дар баробари фақирону ниёзмандон ба хонаводаи шаҳидоне, ки дар роҳи муҳофизати марзу буми Ватан қурбон шудаанду оилаҳои онҳо бесаробон мондаанд, бидиҳанд.

Ёдовар мешавем, ки иди Фитр яке аз ду иди бузурги мусалмонони ҷаҳон мебошад, ки он ҳамасола дар рӯзи аввали моҳи шаввол таҷлил мегардад.

Тибқи Қонуни Ҷумҳурии Тоҷикистон «Дар бораи рӯзҳои ид» рӯзи Иди Рамазон, 13 май рӯзи истироҳат эълон карда шудааст.

АМИТ «Ховар»

Tags: