14 июн дар Муассисаи давлатии «Маркази ҷумҳуриявии иммунопрофилактика» рафти фаъолияти кории муассисаҳои тандурустӣ ва корҳои то имрӯз анҷомшуда дар доираи табодули таҷриба бо табибони Полша, ки аз 06 июни соли ҷорӣ дар ҳайати 16 нафар дар ҶТ қарор доранд, натиҷагирӣ шуд.
Тавре аз Вазорати тандурустӣ ва ҳифзи иҷтимоии аҳолии мамлакат ба АМИТ «Ховар» иттилоъ доданд, муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Саида Умарзода ба гурӯҳи табибони Полша, ки дар давраи сипаришуда бо кори муассисаҳои тандурустӣ дар шаҳри Душанбе ва ВМКБ дар мубориза алайҳи COVID-19 шинос шуда, бо ҳамтоёни тоҷики худ табодули таҷриба карданд, арзи сипос намуд.
Табибони Полша низ аз рафти фаъолияти муассисаҳои тандурустӣ изҳори қаноатмандӣ намуда, ба кордонии мутахассисони тоҷик дар мубориза алайҳи бемории каронавируси COVID-19 баҳои баланд доданд.
Гуфта шуд, ки рӯзҳои наздик сафари кории як гурӯҳ аз табибони Полша ба вилояти Суғд низ доир шуда, дар назар аст, ки табибон зимни сафар аз кори мутахассисони муассисаҳои тандурустии вилоят боздид намоянд.
Қобили қайд аст, ки аз давраи омаданашон ба ҶТ, мутахассисони хориҷӣ ба ду гурӯҳ тақсим шуда, аз рафти корҳо дар як қатор муассисаҳои танурустии шаҳри Душанбе ва вилояти Мухтори Кӯҳистони Бадахшон дидан намуда, бо ҳамтоёни тоҷики худ дар мубориза алайҳи бемории каронавируси COVID-19 табодули таҷриба карданд.
Дар доираи чорабинии баргузоршуда, бо иштироки сардорони раёсатҳои тандурустии вилоятҳо, сардухтурони муассисаҳои тандурустии шаҳру навоҳии мамлакат видеоконфронс гузаронида шуда, атрофи дастовардҳои соҳа дар мубориза алайҳи COVID-19, мушкилиҳои ҷойдошта ва роҳҳои рафъи он, табодули назар сурат гирифт.
Бояд таъкид намоем, ки 14 июн гурӯҳи нави табибони Полша ва коршиносони Созмони Умумиҷаҳонии Тандурустӣ иборат аз 9 нафар ба Тоҷикистон ташриф оварданд. Мақсад аз ташрифи мутахассисон табодули таҷриба бо табибони тоҷик ҷиҳати пешгирӣ ва табобати бемории сироятии COVID-19 иборат мебошад.
АМИТ «Ховар»