Дар шаш моҳи соли равон аз тарафи Бонки давлатии амонатгузории Ҷумҳурии Тоҷикистон «Амонатбонк» ба омўзгорони ҷавон 1,1 млн. сомонӣ ва муҳоҷирони ихтиёрию экологӣ 238,5 ҳазор сомонӣ қарзҳои дарозмуддати имтиёзнок пешниҳод шудааст.
Дар ин бора зимни нишасти хабарӣ, ки 19 июл дар Душанбе баргузор гардид, иттилоъ дода шуд.
Зикр гардид, ки дар доираи ҳамкории дуҷониба бо Муассисаи давлатии «Фонди дастгирии соҳибкории назди Ҳукумати Ҷумҳурии Тоҷикистон» дар маҷмӯъ ба 121 нафар соҳибкорон дар ҳаҷми 106 млн. сомонӣ маблағгузорӣ карда шуд.
Инчунин «Амонатбонк» ба муштариён қарзҳои хурди бо фоизҳои нисбатан имтиёзноки судмандро пешниҳод намуда истодааст. Ин намуди қарз бештар ба кормандони соҳаи маориф, тиб, нафақагирон ва умуман дастгирии сатҳи иҷтимоии мардуми кишвар, бо роҳи ниҳоят содашудаи ҳуҷҷатгузорӣ тавассути филиалҳои «Амонатбонк» дар тамоми манотиқи ҷумҳурӣ пешниҳод шуда истодааст.
Ҳамзамон бо мақсади дастгирии иҷтимоии мардуми ҷумҳурӣ, хусусан кормандони соҳаи буҷетӣ Амонатбонк қарзҳои овердрафтиро тавассути кортҳои пардохтии бонкӣ ба роҳ монда истодааст, ки истифодабарии он хело қулаю дастрас мебошад.
Дар нимсолаи аввал, бақияи сандуқи қарзии бонк 1,3 млрд. сомониро ташкил медиҳад, ки нисбат ба ҳамин давраи соли 2015 244,2 млн.сомонӣ ё 23% зиёд мебошад.
АМИТ «Ховар»