Хабар

Муовини вазири корҳои хориҷии Ҷумҳурии Тоҷикистон Музаффар Ҳусейнзода 11 октябр Сафири Ҷумҳурии Лаҳистон дар Ҷумҳурии Тоҷикистон (бо иқоматгоҳ дар шаҳри Тошканд) Петр Ивашкевичро ба ҳузур пазируфт.
Зимни мулоқот ҷонибҳо доир ба ҳолати кунунӣ ва дурнамои рушди муносибатҳои Тоҷикистону Лаҳистон ибрози андеша намуда, умедвории амиқро аз таҳкими минбаъдаи онҳо баён карданд.

10 октябри соли равон вохӯрии Сафири Ҷумҳурии Тоҷикистон дар Амороти Муттаҳидаи Араб (АМА) Баҳодур Шарифӣ бо муовини вазири корҳои хориҷии АМА оид ба масъалаҳои иқтисодӣ ва тиҷоратӣ Муҳаммад Шараф баргузор гардид. Зимни вохӯрӣ дурнамои рушди ҳамкории иқтисодию тиҷоратӣ, сармоягузорӣ ва сайёҳӣ, инчунин сафари дарпешистодаи ҳайати расмии АМА ба Тоҷикистон мавриди муҳокима қарор гирифтанд.

 Бино ба иттилои Хадамоти матбуоти вилояти Суғд дар моҳҳои январ-сентябри соли 2016 корхонаҳои саноатии вилояти Суғд ба маблағи наздик ба 4,7 миллиард сомонӣ маҳсулот истеҳсол кардаанд.
Ҳаҷми истеҳсоли маҳсулоти саноатӣ нисбат ба ҳамин давраи соли 2015 бо назардошти индекси нархҳои истеҳсолкунандагони маҳсулоти саноатӣ 137,2 фоизро ташкил кард.