Президенти Украина Владимир Зеленский аз рӯи натиҷаҳои ҷаласаи корӣ қарор кард, ки 9 январ дар робита ба суқути ҳавопаймои украинӣ дар Эрон, ки дар натиҷа 176 нафар ҳалок шуданд, рӯзи мотам эълон карда шавад. Дар ин бора АМИТ «Ховар» бо истинод ба изҳороти дафтари президент, ки дар сомонаи расмиаш нашр шудааст, хабар медиҳад.
«Ба хотираи фавтидагон президент қарор кард, ки парчамҳои давлатии Украина дар биноҳо ва сохторҳои мақомоти давлатӣ, ҳукуматҳои маҳаллӣ, корхонаҳо, муассисаҳо ва ташкилотҳои давлатӣ поён фароварда шаванд», — омадааст дар хабар.
Имрӯз ҳамчунин дар Ҷумҳурии Исломии Эрон ба хотири қурбониёни суқути ҳавопаймои Ширкати байналмилалии ҳавопаймоии Украина рӯзи мотам эълон шудааст, хабар медиҳад портали fromua.news бо такя ба намояндаи ҳукумати Эрон Алӣ Рабеӣ.
Тавре дирӯз АМИТ «Ховар» хабар дод, ҳавопаймои Ширкати байналмилалии ҳавопаймоии Украина Boeing 737 8 январ пас аз парвоз аз фурудгоҳи Имом Хумайнӣ дар Теҳрон суқут кард. Дар ҳавопаймо шаҳрвандони 7 кишвар қарор доштанд — 167 мусофир ва 9 аъзои сарнишин. Ҳамаи онҳо ҳалок гаштанд.
Дар робита ба ин ҳодиса дирӯз Президенти Ҷумҳурии Тоҷикистон, Пешвои миллат Эмомалӣ Раҳмон ба Президенти Украина Владимир Зеленский ва Президенти Ҷумҳурии Исломии Эрон доктор Ҳасани Рӯҳонӣ барқияи тасаллият ирсол намуданд.
Дабири кулли СММ Антониу Гутерриш низ ба наздикону пайвандони ҳалокшудагони суқути ҳавопаймо дар Эрон тасаллияти амиқ изҳор кард, хабар медиҳад АМИТ «Ховар» бо истинод ба дафтари матбуоти ин созмон.
АМИТ «Ховар»