Аз 26 то 30 июли соли 2016 дар ҳудуди вилояти Суғд бо ҷалби кормандони сохтору мақомоти давлативу қудратӣ ҷамъомади мудофиаи ҳудудӣ, машғулиятҳои омодагии сафарбарӣ ва маҷмўи машқҳои муштараки амалиётӣ-тактикии зиддитеррористӣ бо тирпаронии ҷангӣ баргузор гардиданд, ки ба он беш аз 30 ҳазор нафар ҷалб карда шуданд.
Чорабинӣ дар 4 марҳила дар ҳудуди вилояти Суғд ва дар машқгоҳҳои низомии Чоруқдарону Нурафшон ба таври назариявию амалӣ ҷараён гирифта, дар ҳар як ноҳия захираи эҳтиётии даъватшавандагон, шаҳрвандони дар қайди Комиссариатҳои ҳарбӣ буда, техникаҳои хоҷагии халқ ва дигар лавозимоте, ки барои баргузории маҷмўи машқҳои амалиётӣ-тактикии зиддитеррористӣ заруранд, истифода гардиданд.
Афсари маркази матбуоти Вазорати мудофиаи Ҷумҳурии Тоҷикистон, подполковник Фарҳод Ибодуллоев изҳор дошт, ки бо Фармони Сарфармондеҳи Олии Қувваҳои Мусаллаҳ «Оид ба тасдиқ ва дар амал татбиқ намудани нақшаи мудофиаи ҳудудии Ҷумҳурии Тоҷикистон» ва дар асоси нақшаи ягонаи омодагии ҷангӣ, ба ҷамъомади мудофиаи ҳудудӣ раисони шаҳру навоҳии вилояти Суғд ва масъулини тамоми сохторҳои қудратии ин минтақа ширкат намуда, онҳо ба машғулиятҳои омодагии сафарбарӣ, сафороиву қадамзанӣ, тартиби дурусти ҳуҷҷатгузорӣ, тирпаронӣ аз техникаҳои вазнини зиреҳпўши ҷангӣ, силоҳу муҳимоти сабуки ҳарбӣ ҷалб шуданд. Дар машқҳои муштараки амалиётӣ-тактикии зиддитеррористӣ ҷузъу томҳои сохторҳои қудратии гарнизони Суғд, аслиҳаи мухталифи оташфишон, авиатсияи ҷангӣ ва зиёда аз 100 адад техникаи зиреҳпўши ҳарбиву артиллерӣ ва автомобилӣ истифода гардиданд.
Ҳадафи баргузории ин машқҳо сайқал додани таҷрибаи ҳайати шахсии ширкаткунандагон дар ташкили амалиёти бомуваффақонаи ҷангӣ, ҳамоҳангии сохторҳои низомии мамлакат дар сурати ба вуқўъ пайвастани хатарҳои эҳтимолӣ, санҷиши дурусти дастаҳои амалиётӣ- тактикӣ, вусъат додани қувва ва воситаҳои минтақаҳои мудофиаи ҳудудӣ, баланд бардоштани омодагии рўҳиву равонӣ, қобилияти ҷангиву ҷисмонӣ ва сафарбарии қўшунҳо дар самти доир кардани унсурҳои мухталифи ҷангии зиддитеррористӣ дар шароити дашту саҳро ва кӯҳистони ҳудуди ҷумҳуриро дар бар мегирад.