Дар шаҳри Бохтар мусобиқаи шоҳмот барои дарёфти «Ҷоми Пешвои миллат» баргузор гардид. Мусобиқаи мазкур дар доираи сиёсати варзишии Президенти мамлакат муҳтарам Эмомалӣ Раҳмон роҳандозӣ гардида, дар он 150 нафар ҳаводорону варзишгарони риштаи шоҳмот қувваозмоӣ намуданд.
Тибқи иттилои мудири бахши варзиши Раёсати кор бо ҷавонон ва варзиши вилояти Хатлон Алишер Гулов дар ин чорабинии варзишӣ 14 дастаи шоҳмотбозони минтақаи Бохтар, духтарон аз 8 то 14-сола, писарон аз 15 то 30-сола, мардон ва бонувон аз 30 сола боло барои ба даст овардани ғолибият миёни ҳам рақобат карданд.
Бо натиҷагирӣ аз ҷараёни мусобиқа беҳтарин шоҳмотбозон муайян гардида, бо медалу дипломҳои Раёсати кор бо ҷавонон ва варзиши вилояти Хатлон сарфароз гардонида шуданд. Ҳамзамон 12 нафар шоҳмотбоз барои иштирок дар даври ҷумҳуриявии мусобиқа роҳхат гирифтанд.
АМИТ «Ховар»