26 август дар Донишкадаи тарбияи ҷисмонии Тоҷикистон ба номи Саидмуъмин Раҳимов вобаста ба интихоботи навбатии Президенти Ҷумҳурии Тоҷикистон мулоқот доир гардид. Дар он коршиносону аъзои Комиссияи марказии интихобот ва раъйпурсии ҷумҳурӣ (КМИР), намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дигар ниҳодҳои соҳаи варзиш иштирок намуданд. Дар мулоқот ба иштирокдорон моҳият, зарурати интихоботи Президенти Ҷумҳурии Тоҷикистон ва нақши овози ҳар овоздиҳанда дар он фаҳмонида шуд.
Узви Комиссияи марказии интихобот ва райъпурсӣ Махфират Хидирзода зикр намуд, ки «соли 2020 дар ҳаёти мамлакат соли рӯйдодҳои муҳими сиёсӣ мебошад. Зеро моҳи марти соли равон интихоботи вакилони Маҷлиси намояндагони Маҷлиси Олӣ баргузор гардида, 11 октябр баргузории интихоботи Президенти Ҷумҳурии Тоҷикистон дар назар аст. Бояд гуфт, ки интихоботи президентӣ чун маъракаи муҳими сиёсӣ дар чаҳорчӯбаи Конститутсия ва қонунгузории интихоботии ҷумҳурӣ танзим карда мешавад».
Дар ҳамоиш зикр шуд, ки коркард шудани барномаи мобилии Тоҷикистон, интихобот ва Президент саривақтӣ буда, он дар махзани барномаҳои мобилии «Плеймаркет» гузошта шудааст. Барномаи мазкур хусусияти иттилоотӣ дошта, дар он қонунҳо, иқтибосҳо аз конститутсия дар бораи интихобот, тартиби иштироки намояндагони ВАО дар интихобот, инчунин мушоҳидони миллӣ ва байналмилалӣ ҷой дода шудааст. Ҳар нафар метавонад тариқи интернет маълумоти зарурӣ дастрас намояд.
АМИТ «Ховар»