Дар давоми семоҳаи аввали соли 2017 гардиши савдои хориҷии вилояти Суғд 454616,4 ҳазор доллари ИМА-ро ташкил дод, ки ин нишондод нисбат ба ҳамин давраи соли 2016 26,9 фоиз зиёд гардидааст. Ҳоло коргоҳҳои саноатии вилояти Суғд бо 41 мамлакат, аз ҷумла бо 10 давлати ИДМ ва 31 давлати хориҷи дур муносибати савдои хориҷӣ доранд.
Дар семоҳаи аввали соли 2017 гардиши савдои хориҷии вилоят ба ҳиссаи мамлакатҳои ИДМ 81,4 фоиз ва ба ҳиссаи мамлакатҳои хориҷи дур 18,6 фоиз рост омад. Дар маҷмӯъ, ҳаҷми гардиши савдои хориҷӣ дар семоҳаи аввали соли равон нисбат ба ҳамин давраи соли 2016 бо мамлакатҳои ИДМ 34,6 фоиз ва бо мамлакатҳои хориҷи дур 1,3 фоиз зиёд гардидааст.
Дар ин давра содироти меваи хушк 23,7 фоиз ва маҳсулоти маъданӣ 2,7 баробар афзуда, дар ин радиф, маҳсулоти истеҳсолии коргоҳҳои вилояти Суғд дар ин давра бештар ба мамлакатҳои Қазоқистон, Чин, Ўзбекистон, Туркия ва Италия афзалияти содиротӣ доштанд.
АМИТ "Ховар"