Дар Бонки миллии Тоҷикистон бо мақсади шарҳи Паёми навбатии Асосгузори сулҳу Ваҳдати миллӣ- Пешвои миллат муҳтарам Эмомалӣ Раҳмон ҷаласаи васеъ баргузор гардид.
Тавре ки аз БМТ хабар доданд, муовини раиси Бонки миллии Тоҷикистон Ҳамидулло Машрабзода дар бобати аҳамияти Паёми Сарвари давлат, самтҳои асосии сиёсати дохилӣ ва хориҷии кишвар ва дастуру супоришҳои додашуда сухан гуфт.
Паёми Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ҳуҷҷати муҳими тақдирсоз ба шумор рафта, дурнамои инкишофи давлати миллии Тоҷикистон, рушду инкишофи соҳаҳои иқтисодӣ, иҷтимоӣ, сиёсӣ, фарҳангӣ ва ҳуқуқиро барои давраҳои миёнамуҳлат муайян месозад. Дастуру ҳидоят ва супоришу вазифагузориҳое, ки дар Паёми имсолаи Президенти мамлакат садо дод, барои баланд бардоштани сатҳи зиндагии аҳолии кишвар ва таъмини пешрафти иқтисодии мамлакат нигаронида шудааст, — изҳор дошт Ҳамидулло Машрабзода.
Сардори шуъбаи ҳуқуқи Бонки миллии Тоҷикистон Шамсулло Давлатов иштирокдорони ҷаласаро ба таври васеъ бо масъалаҳои Паёми имсола шинос намуда, аз иштирокдорон талаб намуд, ки ба вазифаҳои дар назди кормандони низоми бонкии мамлакат аз ҷониби Сарвари давлат гузошташуда таваҷҷуҳи ҷиддӣ зоҳир намоянд.
Зикр гардид, ки масъалагузориҳои Пешвои миллат дар мавриди рушди соҳаи бонкдорӣ, ҳимояи манфиатҳои амонатгузорон ва ба ҷойи кор таъмин намудани занону духтарон дар муассисаҳои низоми бонкӣ ва дигар бахшҳои хизматрасонӣ собит месозанд, ки ин мавзӯъ доимо зери назари бевоситаи Пешвои миллат қарор доранд. Аз ин рӯ, ҷиҳати иҷрои вазифаву ҳадафҳои Паёми Пешвои миллат ҳар кадоме аз иштирокдорон масъулияти бештарро бояд эҳсос кунанд.
АМИТ «Ховар»