Кормандони Раёсати минтақавии гумрукӣ дар шаҳри Душанбе воридот ва муомилоти ғайриқонунии маводи дорувориро ошкор ва пешгирӣ намуданд.
Тавре ба АМИТ «Ховар» аз маркази матбуоти Хадамоти гумруки назди Ҳукумати ҶТ хабар доданд, ҳангоми гузаронидани амалиёти гумрукӣ аз тарафи кормандони Шуъбаи ташкили мубориза бар зидди ҳуқуқвайронкуниҳои гумрукии Раёсати минтақавии гумрукӣ дар шаҳри Душанбе маълум гардид, ки намояндаи тиҷоратии филиали ширкати «Курамакс» ЛТД шаҳрванд И.Г., соли таваллудаш 1964, бо супориши директори филиали ширкати «Курамакс ЛТД»-и Ҷумҳурии Ҳиндустон дар Ҷумҳурии Тоҷикистон ба сифати намояндаи тиҷоратӣ фаъолият намуда, бо мақсади муомилоти ғайриқонунии маводи доруворию молҳои тиббии бесифат ва ба талаботи стандартҳои муқарраргашта ҷавобгў набударо бар хилофи талаботи стандартҳои меъёрию-ҳуқуқии дар соҳаи фаъолияти фармасевтӣ амалкунанда, дар ҷои нигаҳдории воситаи нақлиёт (гараж)-и иҷора гирифтааш бо мақсади минбаъд ба муомилот баровардан ғайриқонунӣ ҷойгир менамояд.
Баъдан барои дар амал татбиқ намудани нақшаи ҷинояткоронаи пешакӣ тарҳрезишуда, мунтазам аз дохили анбори муваққатиаш як қисми маводи доривории ба талаботи стандарт ҷавобгӯй набударо ба муомилот бароварда, дар дорухонаҳои шаҳри Душанбе ва вилояти Хатлон ба фурӯш гузошта, боқимондаи маводи дорувориро дар анбори муваққатиаш ғайриқонунӣ нигоҳ медорад.
Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони Раёсати минтақавии гумрукӣ дар шаҳри Душанбе, аз анборҳои муваққатии И.Г. маводи дориворию молҳои тиббии гуногунтамға, аз қабили ҳабҳои тамғаи «Мефипристон-25 мг», «Мизопростол», «Спазмалгон», хокаҳои (порошок)-и тамғаи «Фарамакс», капсулаҳои тамғаи «Тангкат Али Платинум», «Сила Императора», «Эссенциале форте Н», сӯзандоруи 1 гр., система барои гузаронидани маҳлулҳои инфизионӣ ва ғайра дар ҳаҷмҳои гуногун ёфта гирифта шуданд.
Мувофиқи хулосаи ташхиси Хадамоти назорати давлатии фаъолияти фармасевтии Ҷумҳурии Тоҷикистон маводи дорувории гирифташуда барои ҳаёт ва саломатии истеъмолкунандагон зарар дошта, барои истифодаи онҳо иҷозат дода намешавад.
Аз рўи ин ҳодиса нисбат ба И.Г. ва дигарон парвандаи ҷиноятӣ оғоз гардида, он аз рӯи тобеияти тафтишотӣ ба Прокуратураи шаҳри Душанбе ирсол карда шудааст.