Ҳамкории минбаъдаи Кумитаи миллии олимпии Тоҷикистон бо шаҳри Аомории Япония баррасӣ гардид

20 ноябр ноиби Президенти Кумитаи миллии олимпии Ҷумҳурии Тоҷикистон Аҳтам Абдуллозода бо ҳайати намояндагони Ҳукумати шаҳри Аомории Япония, ки бо роҳбарии мудири Бахши рушди дастаи мунтахаби олимпӣ ва паралимпӣ, рушди варзиш дар маҳал ва масъалаҳои иқтисодии шаҳр ҷаноби Шинйа Ойама бо сафари корӣ ба Тоҷикистон омадаанд, мулоқот кард. Дар ин бора АМИТ «Ховар» бо истинод ба Кумитаи миллии олимпии Ҷумҳурии Тоҷикистон хабар медиҳад.

Аҳтам Абдуллозода меҳмононро ба Кумитаи миллии олимпӣ хайрамақдам гуфта, ба ҷониби шаҳри Аоморӣ барои қабул ва дар сатҳи баланд гузаронидани ҷамъомади машқӣ-таълимии дастаи мунтахаби дзюдои Тоҷикистон қабл аз Чемпионати ҷаҳон-2019 дар Токио миннатдорӣ баён намуд.

Зикр шуд, ки тамринҳо дар Аоморӣ ба варзишгарони мо кумак карданд ва онҳо дар Чемпионати ҷаҳон маҳорати баланд нишон доданд. Варзишгари маъруфи мо Беҳрӯз Хоҷазода дар Гран Прии Тошканд ба гирифтани медали нуқра мушарраф шуд.

Шинйа Ойама дар навбати худ ба Кумитаи миллии олимпии Тоҷикистон барои интихоби шаҳри Аомориро ҳамчун шаҳри мизбон барои варзишгарони тоҷик қабл аз Бозиҳои олимпии Токио-2020 ташаккур гуфта, иброз намуд, ки барои тамрини дастаҳои мунтахаби Тоҷикистон қабл аз Бозиҳои олимпии Токио тамоми шароитро муҳайё мекунанд.

Ҷонибҳо дар идома масъалаҳои ҳамкорӣ дар соли 2020 ва расонидани кумаки техникии шаҳри Аоморӣ ба дастаҳои мунтахаби Тоҷикистонро баррасӣ намуданд.

Пас аз мулоқот меҳмонон осорхонаи «Шарафи олимпӣ»-ро тамошо карда, бо дастоварди варзишгарони тоҷик дар даврони соҳибистиқлолӣ шинос гардиданд.

Ёдовар мешавем, ки шаҳри Аомории Япония қабл аз Бозиҳои олимпии Токио-2020 мизбони Тоҷикистон таъйин шудааст. 5 октябри соли 2018 зимни сафари расмии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон ба Япония миёни Кумитаи миллии олимпии Тоҷикистон ва шаҳри Аомории Япония Ёддошти тафоҳум ба имзо расид.

АКС АЗ КМОТ
АМИТ «Ховар»

Tags: