Дар Тоҷикистон намояндагии Созмони озуқаворӣ ва кишоварзии Созмони Милали Муттаҳид /СММ/ ифтитоҳ карда мешавад. Дар ин росто Парлумони Тоҷикистон Созишнома байни Ҳукумати Ҷумҳурии Тоҷикистон ва Созмони озуқаворӣ ва кишоварзии СММ (Food and Agriculture Organization, FAO) оид ба таъсиси намояндагии ин ташкилотро дар Ҷумҳурии Тоҷикистон ба тасвиб расонд.
Изатулло Сатторӣ, вазири кишоварзии Тоҷикистон зимни тавзеҳи масъалаи мазкур дар Парлумони кишвар гуфт, ки Созишнома байни Ҳукумати Ҷумҳурии Тоҷикистон ва СММ оид ба таъсиси намояндагии ин созмон дар Тоҷикистон дар Конфронси минтақавии Созмони озуқаворӣ ва кишоварзии СММ 6 майи соли 2016 дар шаҳри Анталияи Туркия ба имзо расидааст. Таъсиси намояндагии Созмони озуқаворӣ ва кишоварзии СММ дар Тоҷикистон ба ҳамкории дуҷониба, ҷалби сармоягузории институтҳои молиявӣ таҳким бахшида, ҷабҳаҳои фаъолият ва робита бо намояндагии марказӣ, шуъбаҳои минтақавӣ дар Аврупо ва Осиёи Марказӣ тавассути ин намояндагӣ дар ҷумҳурӣ густариш меёбанд
Дар доираи ин санад Ҳукумати Ҷумҳурии Тоҷикистон ба намояндагии FAO барои ҳамкории муфид ҷиҳати ворид шудан ба кишвар, будубоши муваққатӣ ба шахсоне, ки дафтари FAO ба Тоҷикистон даъват мекунад ва сафари онҳо ба фаъолияти FAO вобастагӣ дорад, мусоидат менамояд. Тибқи Созишнома масъулини FAO дар асоси машварат бо Ҳукумати Ҷумҳурии Тоҷикистон, шахсон ва мақомоти таъйинкардаи Ҳукумати мамлакат фаъолият намуда, дар мувофиқа бо Ҳукумати Ҷумҳурии Тоҷикистон дар минтақаҳои кишвар барои амалисозии барномаҳо зердафтарҳо таъсис медиҳанд.
FAO моҳи октябри соли 1945 дар шаҳри Квебеки Канада таъсис дода шудааст ва алҳол қароргоҳаш пойтахти Италия- шаҳри Рим аст. FAO аз соли 1996 инҷониб дар Тоҷикистон фаъолият дошта, дар ин муддат наздик ба 90 лоиҳаи сармоягузориро ба маблағи 37 миллион доллар дар бахшҳои илм, таълим, истеҳсолоти кишоварзӣ, мелиоратсияи замин ва об, паст кардани сатҳи камбизоатӣ, бозомӯзии мутахассисон амалӣ намудааст. Имрӯз ин ташкилот аз рӯйи 7 лоиҳа оид ба дастрасӣ ба тухмиҳои баландсифат, идоракунии обёрӣ бо назардошти хизматрасонӣ, мубориза бар зидди малах, механиконии кишоварзӣ, тақвият додани иқтидори Вазорати кишоварзӣ фаъолият мекунад.
