Дар шаҳри Самарқанд Бизнес-форуми доираҳои тиҷоратии вилоятҳои Суғду Самарқанд баргузор гардид

Тавре қаблан иттилоъ дода будем, 20 апрели соли равон бо мақсади иштирок дар Рӯзҳои фарҳангии вилояти Суғди Ҷумҳурии Тоҷикистон дар вилояти Самарқанди Ҷумҳурии Ӯзбекистон гурӯҳи калони намояндагони вилоят бо роҳбарии Раиси вилояти Суғд Раҷаббой Аҳмадзода озими шаҳри Самарқанд шуданд.

Ба иттилои Хадамоти матбуоти Раиси вилояти Суғд, дар доираи  Рӯзҳои фарҳангии вилояти Суғд дар вилояти Самарқанд 21 апрел дар меҳмонхонаи “Регистон плаза” – и шаҳри Самарқанд бо иштироки доираҳои тиҷоратии ҳарду вилоят Бизнес – форум баргузор гардид. Дар маросими ифтитоҳи Бизнес – форум Раиси вилояти Суғд Раҷаббой Аҳмадзода ва Ҳокими вилояти Самарқанд Туробҷон Ҷӯраев иштирок ва суханронӣ намуданд.

Мавриди зикр аст, ки мақсади асосӣ аз ташкили Бизнес – форум густариши робитаҳои тиҷоратӣ ва афзун намудани табодули молу маҳсулот миёни ҷонибҳо мебошад.

Дар рафти Бизнес – форум ба иштирокдорон дар бораи имкониятҳои иқтисодии ҳарду тараф, маҳсулоти истеҳсолшаванда ва имтиёзҳои мавҷуда ҷиҳати мубодилаи маҳсулот маълумот дода шуд.

Дар макони баргузории чорабинӣ маҳсулоти корхонаҳои саноатии вилояти Суғд ва намунаҳои ҳунарҳои миллӣ ба намоиш гузошта шуда, имкониятҳои иқтисодиву кишоварзии вилоят муаррифӣ карда шуд.

«Ҳамчунин 21 апрел ҳайати намояндагони вилояти Суғд аз Боғи фарҳангиву истироҳатии ба номи Алишер Навоии шаҳри Самарқанд боздид намудаанд. Раиси вилояти Суғд Раҷаббой Аҳмадзода ва Ҳокими вилояти Самарқанд Туробҷон Ҷӯраев ҳамчун рамзи эҳтиром бар пояи муҷассамаи мутафаккирони тоҷику ӯзбек — Абдураҳмони Ҷомӣ ва Алишер Навоӣ, ки дар ҳудуди боғ қомат афрохтааст, гулчанбар гузоштанд. Аҳли зиёи вилоятҳои Суғду Самарқанд аз эҷодиёти ин шоирони номвар, ки рамзи дӯстии мардумони тоҷику ӯзбек маҳсуб меёбанд, шеърҳо қироат намуданд», — омадааст дар хабари Хадамоти матбуоти Раиси вилояти Суғд.

Инчунин дар ин рӯз намояндагони вилояти Суғд бо роҳбарии Раиси вилоят ба маҷмааи Ҳазрати Хизр ташриф оварда, оромгоҳи нахустин Президенти Ӯзбекистонро зиёрат намудаанд.

Иттилоъ дода мешавад, ки 21 апрел Раиси вилояти Суғд Раҷаббой Аҳмадзода бо ҳамроҳии ҳокими вилояти Самарқанд Туробҷон Ҷӯраев ба ноҳияи Паст Дарғом ташриф оварда, бо фаъолияти гармхонаи “Паст Дарғом саховати” шинос шуд. Зимни шиносоӣ иттилоъ дода шуд, ки дар гармхонаи мазкур бо усули гидропоникӣ помидор истеҳсол ва асосан ба хориҷа содирот карда мешавад. Тасмим гирифта шуд, ки дар ҳамкорӣ бо роҳбарияти гармхонаи “Паст Дарғом саховати” дар вилояти Суғд чунин гармхонаҳо ташкил карда шавад.

Раиси вилоят ва ҳайати ҳамроҳонаш аз корхонаи “СамАвто” дидан карда, бо ҷараёни истеҳсоли автобус ва автомашинаҳои боркаш шинос шуданд.

АМИТ "Ховар"