Наврасони Тоҷикистон ба Санкт-Петербург ба мусобиқаи «Футбол барои дӯстӣ» мераванд

Мавсими панҷуми лоиҳаи иҷтимоӣ барои кӯдакон- «Футбол барои дӯстӣ», ки марҳалаи ҷамъбастиаш дар шаҳри Санкт-Петербурги Россия аз 26 июн то 3 июли соли равон мегузарад, оғоз ёфт. Дар ҷараёни қуръакашии кушод, ки ҳафтаи гузашта дар шаҳри Ҳамбурги Олмон доир гардид, ҳайати дастаҳои мунтахаби кишварҳо ва мавзеи бозиашон муайян карда шуданд.
Футболбозони наврасеро, ки дар соли 2017 мамлакатҳояшонро муаррифӣ мекунанд, Кумитаи ташкилии лоиҳаи байналмилалии «Футбол барои дӯстӣ» якҷоя бо федератсияҳо интихоб менамояд. Дар мусобиқа дастаҳо дар ҳайати 8 нафар (духтарону писарон), ҳамчунин наврасони аз 12 то 14-солае, ки қобилияти маҳдуд доранд, ширкат менамоянд.
Тибқи пешбинӣ, 25 апрел ҳазорон нафар кӯдакону калонсолон дар рӯзи ҷашни байналмилалии футбол ва дӯстӣ ба иштирокчиёни барнома ҳамроҳ мешаванд.
1 июл дар шаҳри СанктПетербурги Россия чемпионати байналмилалии «Футбол барои дӯстӣ» наврасони халқияту миллатҳоро, новобаста ба ҷинсу имкониятҳои ҷисмониашон ба майдони бозӣ меорад.
2 июл форуми панҷуми байналмилалии «Футбол барои дӯстӣ», ки бо иштироки кӯдакону наврасон ва рӯзноманигорони маъруфу шахсони мӯътабар мегузарад, масъалаи ривоҷи ин барномаро дар кишварҳои гуногун мавриди баррасӣ қарор медиҳад.
Дар ҷамъбасти мавсими панҷуми лоиҳаи «Футбол барои дӯстӣ» иштирокдорони форум дар бозии финалии Ҷоми Конфедератсия-2017, ки дар варзишгоҳи «Санкт-Петербург Арена» баргузор мегардад, ширкат менамоянд.
Лоиҳаи байналмилалии иҷтимоии кӯдакон- «Футбол барои дӯстӣ» дар чаҳорчӯбаи барномаи «Газпром барои кӯдакон» аз ҷониби ҶСО «Газпром» роҳандозӣ шудааст. Мақсади барнома ривоҷи футбол байни кӯдакону наврасон, таҳаммулпазирӣ ва эҳтиром гузоштан ба фарҳангу оини миллатҳои гуногуни кишварҳои сайёра мебошад.
Директори тиҷоратии ФИФА Филлип Ле Флок гуфтааст: «Ташаббуси «Газпром» имконият медиҳад, ки кӯдакон дар саросари ҷаҳон шунида шаванд ва мо ба мақсаду арзишҳои асосии «Футбол барои дӯстӣ» баҳои баланд медиҳем. Мо омодаем, ки ташаббуси Кумитаи ташкилии барномаро то оғози Чемпионати ҷаҳон -2018 дастгирӣ намоем».
Ҳазорон нафар иштирокдорон дар тамоми ҷаҳон ҳар сол ба ин барнома ҳамроҳ мешаванд. Шумораи кишварҳое, ки ба он пайвастаанд, аз 8 дар соли 2013 ба 64 дар соли 2017 расидааст. Садҳо футболбозони наврас сафири ҳаракати «Футбол барои дӯстӣ» мегарданд. Рамзи лоиҳаи «Футбол барои дӯстӣ»-ро, ки аз дастбанде иборат аст, беш аз 400 000 нафар одамон дар тамоми сайёра бо худ мегардонанд. Ба ин қатор кӯдакон, калонсолон, варзишгарону рӯзноманигорони маъруф ва ҳунармандону сиёсатмадорони як қатор кишварҳо ҳамроҳ шудаанд.

АМИТ «Ховар»