Аввалин гурӯҳи зоирони тоҷик ба Арабистони Саудӣ сафар карданд

Дирӯз, 5 август аввалин гурӯҳи зоирини  Тоҷикистон ба Арабистони Саудӣ сафар карданд. Ба ин гурӯҳ 180 нафар зоирон шомил мебошанд.

Дар ин бора ба хабарнигори АМИТ «Ховар» Шукӯҳи ДАЛЕР сухангӯи Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Афшини Муқим хабар дод.

Раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Сулаймон Давлатзода чанде қабл, зимни нишасти матбуотии кумита ба хабаргнигорон иттилоъ дода буд, ки дар мавсими имсола аз Тоҷикистон зиёда аз 6 ҳазор нафар зоирин маносики ҳаҷро ба ҷо меоранд.

Ба иттилои Афшини Муқим аз ин шумораи умумии зоирони тоҷик 50 фоиз  бо ширкатҳои ҳавопаймоии Тоҷикистон ва 50 фоизи дигар тариқи ширкатҳои ҳавопаймоии Арабистони Саудӣ сафар мекунанд.

Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон арзиши хизматрасониҳо барои мавсими «Ҳаҷ-2018» муайян намуд, ки он 33 ҳазору 410 сомониро ташкил медиҳад.

Ба маблағи зикршуда хароҷоти чиптаи ҳавопаймо (рафту омад), иқомат ва будубош дар Маккаи мукаррама, таъмини ҳоҷиён бо се вақт хӯроки гарм дар Макка ва Мадина, таъмини ҳоҷиён бо хӯрок дар мавзеъҳои Мино, Арафот ва Муздалифа, таъмини роҳбаладони соҳибтаҷриба ва забондон барои ҳар як гурӯҳ дар тӯли сафари ҳаҷ, иқомат дар Мино, Муздалифа ва Арафот дохил мешавад.

Пардохти маблағи қурбонии ҳоҷиён, таъмини нақлиёт барои интиқоли ҳоҷиён: Ҷидда – Макка – Мино – Арафот – Муздалифа – Мино – Макка – Мадина, пардохти маблағи ширкатҳои хизматрасон дар Арабистони Саудӣ, таъмини ҳоҷиён бо пизишкони баландихтисос дар мавсими ҳаҷ, ташкили нуқтаҳои тиббӣ дар Макка ва Мадина, таъмини ҳоҷиён бо бейҷикҳо, маълумотномаҳо ва китобчаҳо доир ба ҳаҷ, таъмини ҳоҷиён бо 5 литр оби зам-зам аснои бозгашт ба Ватан ва ҷузвдон низ ба маблағи мазкур дохил мешавад.

Зимнан моҳи майи соли равон дар арафаи фарорасии моҳи шарифи Рамазон Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон бо намояндагони аҳли ҷамоатчигии  кишвар мулоқот намуда,  оид ба масъалаҳои иҷтимоӣ ва глобалии замони муосир суханронӣ намуданд. Сарвари давлат,  аз ҷумла, зикр намуданд: «Баъзе ҳамватанони мо зиёратро ба тиҷорат табдил дода, чандин бор ба ҳаҷ мераванд. Дар ҳоле ки метавонанд маблағи ҳаҷҷи такрориро барои кумак ба хешу табори муҳтоҷашон, таъмири роҳи деҳаи худ ё бунёди мактабе, ки фарзандону набераҳояшон дар он бо шароити беҳтар таҳсил хоҳанд кард, сарф кунанд».

 Дар ин робита Афшини Муқим иброз дошт: «Тибқи муқаррарот, дар асоси Қарори Ҳукумати Ҷумҳурии Тоҷикистон дар бораи тартиби сафарбарнамоии шаҳрвандони Ҷумҳурии Тоҷикистон ба ҳаҷ ва умра шаҳрванд ҳақ дорад, ки дар 5 сол як маротиба маносики ҳаҷро адо намояд». Номбурда ҳамчунин илова намуд: «Агар ба таълимоти шариати исломӣ назар намоем, пайдост, ки ҳаҷ барои шахсони аз лиҳози ҷисмонӣ ва молӣ тавоно дар давоми ҳаёт фақат як маротиба фарз гардидааст. Ҳаҷи такрорӣ дар мазҳаби мо як ибодати нофила дониста мешавад. Аммо агар ҳамватанони мо ба ҷои ҳаҷи такрорӣ ба дигар корҳои хайру савоб даст зананд, махсусан садақаҳои ҷорияро анҷом диҳанд, савоби он аз ибодатҳои нофила бештар аст. Аз ин дидгоҳ, Пешвои миллат дуруст таъкид доштанд, ки пеш аз он, ки мо нияти  сафари ҳаҷ мекунем, бояд бубинем, ки аз ҷиҳати моддӣ, молӣ ва ҳатто маънавӣ то чӣ андоза ба ин сафар омода ҳастем. Оё наздикону пайвандон ва ҳаққу ҳамсояҳои мо дар чӣ шароите зиндагӣ мекунанд? Зимнан, мақоли машҳури «Каъба чӣ меравӣ, дилеро дарёб»-и гузаштагони мо бесабаб нест”.

Ба иттилои номбурда дар ин мавсим ба ҳаҷравандагон беш аз 130 роҳбалад ва ҳудуди 15 табиби баландихтисос хизмат мерасонад.

Охирҳои соли 2017 дар ҳузури муовини Сарвазири Ҷумҳурии Тоҷикистон Азим Иброҳим ҷаласаи навбатии Комиссияи «Ҳаҷ-2017» оид ба ҷамъбасти фаъолият дар соли 2017 ва омодагиҳо ба мавсими 2018 баргузор гардид. Азим Иброҳим бо нигаронӣ аз саривақт нарасонидани кумаки аввалияи тиббӣ, аз фарзияти ҳаҷ ва касбияти кор бархӯрдор набудани баъзе аз роҳбаладон ва бо роҳҳои ғайрирасмӣ ба ҳаҷ сафар намудани шаҳрвандон ёдовар шуданд. Дар ин хусус Афшини Муқим  зикр кард: «Барои рафъи норасоиҳои ҷойдошта дар мавсими қаблии ҳаҷ дар Кумита нақшаи чорабиниҳо тартиб дода шудаанд. Бо дарназардошти гармии аз ҳад зиёди шаҳрҳои Макка ва Мадина мавсими ҳаҷ баъзан бидуни сахтиву машаққат ба анҷом расиданаш мушкил аст. Аммо новобаста аз ин, мақоми ваколатдор аз ҳамаи имконоти мавҷуда истифода хоҳад кард, то мавсими навбатии ҳаҷ бо муваффақият ба анҷом расонида шавад”.

Мавриди зикри хос аст, ки адои маносики  Ҳаҷ аз 25 то 30 рӯзро дар бар мегирад.

АМИТ«Ховар»