23 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба маҳаллаи Абӯалӣ ибни Синои шаҳри Кӯлоб ташриф оварда, бинои иловагии Муассисаи таҳсилоти миёнаи умумии рақами 41 ба номи Одил Комиловро ифтитоҳ карданд.
Дар саҳни бинои нави таълимӣ Пешвои миллат бо бардоштани парда аз рӯйи лавҳаи рамзӣ ба фаъолияти он оғоз бахшиданд.
Бинои иловагии муассисаи таълимӣ аз 2 ошёна иборат буда, дорои 10 синфхонаи барҳаво мебошад, ки барои 480 нафар хонанда дар ду баст пешбинӣ гардидааст. Бинои нави таълимӣ бо сифати баланд ва мутобиқ ба талаботи замони муосир аз ҷониби оилаи саховатпешаи Комиловҳо ба истиқболи сазовори ҷашни муқаддаси миллӣ – 30 — солагии Истиқлоли давлатии Тоҷикистон сохта шудааст.
Кабинетҳои фаннии биология, физика, технологияи информатсионии таълимгоҳ бо тахтаҳои электронӣ ва видеопроэкторҳо муҷаҳҳаз буда, бо дастгоҳ ва таҷҳизоту аёнияти дарсӣ пурра таъмин гардидаанд.
Дар бинои навбунёд хонандагон метавонанд, барномаҳои таълимиро бо истифодаи васеъ аз имкониятҳои мавҷуда аз худ намоянд.
Ёдовар мешавем, ки бинои иловагии таълимӣ бо дарназардошти норасоии ҷойи нишаст ва шумораи зиёди хонандагон дар шафати ду бинои якошёна, ки солҳои 2000 ва 2001 сохта шудаанд, бунёд гардидааст. Дар биноҳои таълимии якошёна 14 синфхона, китобхона, утоқи омӯзгорон ва дигар ҳуҷраҳои ёрирасон мавҷуд аст.
Биноҳои мазкур пурра аз таъмири асосӣ бароварда шуда, бо мизу курсии нав ва аёнияти муосири таълимӣ таъмин карда шудаанд. Дар ин биноҳои таълимӣ хонандагон то синфи 9 таҳсил мекарданд.
Сохтмони бинои нави таълимӣ соли 2019 оғоз гардида, он бо тарҳи зебо қомат афрохт, ки дорои шароити арзандаи илмомӯзӣ аст ва масоҳати умумии бинои мазкур 952 метри мураббаъ мебошад.
Пешвои миллат зимни шиносоӣ аз шароитҳои фароҳамшуда дар муассисаи таълимӣ бо хонандагону омӯзгорон суҳбати самимӣ анҷом дода, ифтитоҳи бинои иловагиро ба онҳо таҳният гуфтанд.
Ба Сарвари давлат иттилоъ дода шуд, ки дар Муассисаи таҳсилоти миёнаи умумии рақами 41 дар маҷмуъ як ҳазору 500 нафар хонанда ба таҳсил фаро гирифта мешаванд, ки ба онҳо 66 нафар омӯзгор дарс мегӯянд ва 51 нафари онҳо бонувони соҳибмалака мебошанд.
Сарвари давлат муҳтарам Эмомалӣ Раҳмон аснои шиносоӣ ба сифати корҳои сохтмонӣ баҳои баланд дода, хонандагону омӯзгоронро вазифадор намуданд, ки чунин шароитро барои донишомӯзӣ босамар истифода баранд. Ба таъкиди Пешвои миллат омӯзиши фанҳои дақиқ ва забонҳои хориҷӣ талаботи замон буда, аз масъулон диққати ҷиддиро тақозо мекунад.
Тамоми синфхонаҳои таълимгоҳ бо дастгоҳҳои гармидиҳӣ таъмин буда, он ба шабакаи гармидиҳӣ, ки тариқи ангиштсанг фаъолият мекунад, пайваст гардидааст.
Дар назди Муассисаи таҳсилоти миёнаи умумии рақами 41 майдони муосири варзишӣ дар масоҳати 670 метри мураббаъ сохта шудааст, ки дар он асосан, бозиҳои баскетбол ва волейбол гузаронида мешавад. Ҳамзамон имкон аст, ки дар майдони варзишӣ дарсҳои тарбияи ҷисмонӣ ва мусобиқаҳои гуногун ташкилу баргузор карда шавад.
Атрофи таълимгоҳ бо дарахтони ороишӣ ва гулу буттаҳои мавсимӣ оро ёфта, роҳраву саҳни он пурра сафолакпӯш карда шудааст. Масоҳати умумии муассисаи таълимӣ 0,73 гектарро дар бар мегирад.
Айни ҳамон дар шаҳри Кӯлоб шумораи муассисаҳои таҳсилоти миёнаи умумӣ 74 адад мебошад, ки дар онҳо 48 ҳазору 749 нафар хонанда ба таҳсил ҷалб гардидаанд ва ба онҳо 3 ҳазору 401 нафар омӯзгор дарс мегӯянд.
Бо татбиқи барнома ва нақшаҳои мукаммали самарабахш, соҳаи илму маориф дар мамлакат рушд намуда, ҷараёни бунёду навсозӣ ва муҷаҳҳазгардонии муассисаҳои таълимӣ рӯз то рӯз вусъат меёбад.
АМИТ «Ховар»