Як манбаъ аз мақомоти амниятӣ изҳор дошт, ки дар натиҷаи таркиш як нафар маҷрӯҳ шуд ва мошини Вазорати иқтисод, ки аз ин мавзеъ мегузашт осеб дидааст, хабар медиҳад АМИТ «Ховар» бо истинод ба шабакаи телевизионии tolonews.com.
Кобул субҳи рӯзи душанбе, 25 январи соли 2021 шоҳиди як таркиши дигар шуд. Бино ба гуфтаи як манбаи амниятӣ, мошини кормандони афғони сафорати Италия дар Афғонистон дар минтақаи Парвони II-и ноҳияи чоруми шаҳри Кобул ҳадафи ҳамлаи террористӣ қарор гирифт.
Тибқи маълумоти полиси Кобул, таркиш талафоти ҷонӣ надоштааст, аммо хисороти молӣ ба бор овардааст.
Аммо манбаи дигари амниятӣ изҳор доштааст, ки дар натиҷаи таркиш як нафар маҷрӯҳ шуда, як мошини Вазорати иқтисод, ки аз ин маҳал мегузашт низ осеб дидааст.
Ҳеҷ гурӯҳе, аз ҷумла «Толибон» (мануъ дар Тоҷикистон), масъулияти таркишро ба дӯш нагирифтааст.
Таҳлили иттилооти TOLOnews нишон додаст, ки дар муддати 100 рӯз пас аз он ки Амрулло Солеҳ, муовини аввали Президенти Афғонистон масъулияти амнияти шаҳри Кобулро ба зимма гирифтааст, дар натиҷаи ҳамлаҳои террористӣ ва қатлҳои ҳадафманд 177 нафар кушта ва 360 тани дигар маҷрӯҳ шудаанд.
АМИТ «Ховар»