Дар партави дастури Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 25 то 30 июн 642 шаҳрванди Тоҷикистон аз шаҳрҳои Россия ба Ватан оварда шуданд, хабар медиҳад АМИТ «Ховар» бо истинод ба Вазорати корҳои хориҷии Ҷумҳурии Тоҷикистон.
Бино ба иттилои манбаъ, бо парвозҳои махсуси ширкатҳои ҳавопаймоии «Тоҷик Эйр» ва «Сомон Эйр» 25 июни соли ҷорӣ 230 шаҳрванди Ҷумҳурии Тоҷикистон аз Москва, 26 июн 228 шаҳрванди мамлакат аз Қазон ва 30 июн 184 шаҳрванди кишварамон аз Новосибирск ба Ватан баргаштанд.
«Бо парвозҳои мазкур пеш аз ҳама занону кӯдакон ва беморон, ки бино ба қатъ гардидани парвозҳои байналмилалӣ дар Федератсияи Россия дармонда буданд, оварда шуданд»,- таъкид намуданд дар Вазорати корҳои хориҷии Ҷумҳурии Тоҷикистон.
АМИТ «Ховар»