Имрӯз Сарвазири мамлакат Қоҳир Расулзода бо Раиси иҷрояи Ҷумҳурии Исломии Афғонистон доктор Абдулло Абдулло мулоқоти хосса анҷом дод.
Дар мулоқоти хоссаи Сарвазири мамлакат Қоҳир Расулзода бо Раиси иҷроияи Ҷумҳурии Исломии Афғонистон доктор Абдулло Абдулло ҳолати кунунӣ ва муносибатҳои дуҷонибаю дӯстонаи ҳарду кишвар мавриди баррасӣ қарор дода шуд. Сарвазири мамлакат изҳор дошт, ки Ҷумҳурии Тоҷикистон ҳамеша хостори пойдории сулҳу субот ва амнияту оромӣ дар Афғонистон буда, дар ин самт аз ҷониби Ҳукумати Ҷумҳурии Тоҷикистон, хосса Пешвои миллат муҳтарам Эмомалӣ Раҳмон пайваста тадбирҳои мушаххас роҳандозӣ карда мешаванд.
Зимни мулоқот вобаста ба густариш бахшидани муносибатҳои дӯстонаи байниҳукуматии Тоҷикистону Афғонистон ва пайдо намудани роҳҳои нави расидан ба ҳадафҳо изҳори назар карда шуд.
Дар мулоқоти васеи ҳайатҳо аз тақвият бахшидани муносибатҳои дуҷонибаи неку дӯстонаи ҳарду кишвар, ки бо тадбирандешиҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии исломии Афғонистон Муҳаммад Ашраф Ғанӣ марҳилаи нав касб кардаанд, ёдовар шуданд.
Вобаста ба тақвият бахшидани мубориза бар зидди ҷиноятҳои муташаккил, аз ҷумла, терроризму экстремизм ва гардиши ғайриқонунии маводи нашъавор низ табодули назар карда шуд. Амалӣ гардидани лоиҳаҳои бузурги минтақавӣ дар соҳаҳои афзалиятнок, аз ҷумла, иқтисоду саноат, роҳу нақлиёт, энергетика, маорифу тандурустӣ ва ғайра, ки равобити Тоҷикистону Афғонистонро боз ҳам мустаҳкам намуда, дар баланд гардидани иқтисодиёти ҳарду кишвар заминаи мусоид мегузоранд, махсус таъкид гардид.
Ҳамчунин дар доираи мулоқот аз тарафи Сарвазири мамлакат Қоҳир Расулзода ва Раиси иҷроияи Ҷумҳурии Исломии Афғонистон Абдулло Абдулло Эъломияи муштарак байни Ҷумҳурии Тоҷикистон ва Ҷумҳурии Исломии Афғонистон ба имзо расид.
Ғайр аз ин байни Хадамоти алоқаи назди Ҳукумати Ҷумҳурии Тоҷикистон ва Вазорати мухобирот ва технологияи маълумотии Ҷумҳурии Исломии Афғонистон Созишнома оид ба ҳамкорӣ дар соҳаи алоқа ва технологияҳои иттилоотӣ ва Ёддошти тафоҳум оид ба ҳамкории илмию техникӣ байни Саридораи геологияи назди Ҳукумати Ҷумҳурии Тоҷикистон ва Вазорати маъдан ва петролюми Ҷумҳурии Исломии Афғонистон ба имзо расид.
Дар охири мулоқоту музокироти сатҳи олӣ, ки ҳолати кунунии муносибатҳои неку дӯстонаи Тоҷикистону Афғонистонро фарогир буд, бо иштироки Сарвазири мамлакат Қоҳир Расулзода ва Раиси иҷроияи Ҷумҳурии Исломии Афғонистон дар ҳузури намояндагони воситаҳои ахбори омма нишасти хабарӣ баргузор шуд.
Дар нишаст тарафҳо сафари расмии Раиси иҷроияи Ҷумҳурии Исломии Афғонистон доктор Абдулло Абдулло ба Ҷумҳурии Тоҷикистон, мулоқоту музокироти сатҳи олӣ ва иштироки ӯро дар Конференсияи байналмилии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» натиҷагирӣ карда, онро барои ҳарду давлат манфиатбахш арзёбӣ намуданд.
Ҷонибҳо тақвият бахшидани муносибатҳои густурдаи Ҷумҳурии Тоҷикистон ва Ҷумҳурии Исломии Афғонистонро дар оянда муҳим маънидод карданд.
АМИТ "Ховар"