Ояндаи наздик дар Ҷумҳурии Тоҷикистон бори нахуст Кодекси тандурустии Ҷумҳурии Тоҷикистон қабул карда мешавад. Дар робита ба ин, имрӯз дар ҷаласаи нахустини Шӯрои Маҷлиси намояндагон, ки баъди таътили тобистонаи вакилони палатаи поёнии Парлумони Тоҷикистон таҳти раёсати Шукурҷон Зуҳуров, Раиси Маҷлиси намояндагон доир гардид, лоиҳаи Кодекси тандурустии Ҷумҳурии Тоҷикистон баррасӣ шуд.
Таҳия ва баррасии Кодекси тандурустии Ҷумҳурии Тоҷикистон дар Парлумони кишвар дар ҳолест, ки 18 август дар Ҷумҳурии Тоҷикистон иди касбии кормандони соҳаи тиб, ки ба зодрӯзи мутафаккири бузург ва олими барҷастаи соҳаи тиб Абӯалӣ ибни Сино рост меояд, таҷлил мегардад.
Бояд тазаккур дод, ки Кодекс қонуни ягона ва мураттабгаштаест, ки тавассути он соҳаи муайяни муносибатҳои ҷамъиятӣ пурра, бевосита ва бонизом танзим карда мешавад.
