Бо мақсади боздид аз шароити буду боши наваскарон дар сафи Қувваҳои Мусаллаҳи ҷумҳурӣ гурӯҳи калони волидайни сарбозон иборат аз 70 нафар аз тамоми минтақаҳои вилояти Суғд ба навоҳии ҷануби кишвар сафарбар карда шуданд. Волидайни сарбозонро дар ин сафар намояндагони мақомоти иҷроияи ҳокимияти давлатии вилоят, комиссариати ҳарбӣ, шуъбаи кор бо занон ва оила ҳамроҳӣ намуданд.
Тавре масъулин аз комиссариати ҳарбии вилоят иттилоъ доданд, давоми чанд рӯз аст, ки аъзои гурӯҳ дар чор минтақа — шаҳри Душанбе, ноҳияҳои тобеи марказ, вилояти Хатлон ва водии Рашт тавассути суҳбату мулоқот бо ҳайати роҳбарикунандаи қисмҳои ҳарбӣ ва сарбозон бо шароити хизмату истироҳати фарзандонашон дар сафи Қувваҳои Мусаллаҳ шинос мешаванд.
Бояд тазаккур дод, ки сафарбарнамоии волидон ба ҷануби мамлакат ва шиносоии онҳо бо шароити хизматӣ дар вилояти Суғд ба ҳукми анъана даромада, он ҳамасола бо ташаббуси роҳбарияти мақомоти иҷроияи ҳокмияти давлатии вилоят роҳандозӣ мешавад. Ин имкон медиҳад, то волидон аз наздик бо фарзандони худ, ки дар қисмҳои низомии мамлакат қарор доранд, дидорбинӣ намоянд.
Ба иттилои масъулин, роҳандозии ҳамин гуна тадбирҳо имкон дод, ки сол аз сол теъдоди ихтиёриёни хизмат дар сафи артиш афзояд. Ҳамзамон волидон низ зимни дидорбинӣ фарзандони худро ба ватандӯстиву хештаншиносӣ даъват намуда, ба онҳо хизмати содиқонаю софдилонаро талқин месозанд.
Ҳамзамон бояд гуфт, ки имрӯзҳо дар тамоми қисмҳои низомии мамлакат бо талошҳои пайвастаи Сарфармондеҳи Олии Қувваҳои Мусаллаҳ, Пешвои миллат муҳтарам Эмомалӣ Раҳмон шароити хуб фароҳам оварда шуда, артиши миллӣ низ аз ҷиҳати моддиву техникӣ ва ҳам аслиҳаи ҳарбӣ хеле пуриқтидор гардида, ба неруи мудофиавии табдил ёфтааст. Дар сафи он ҷавонони ҷасуру далери Ватан бо ҳисси баланди ватандориву хештаншиносӣ хизмат менамоянд.
АМИТ "Ховар"