Дирӯз дар Китобхонаи миллии Тоҷикистон (КМТ) бо ташаббуси шуъбаи тарғиб ва баргузории чорабиниҳои фарҳангӣ бахшида ба Рўзи Ваҳдати миллӣ таҳти унвони «Ваҳдат пойдевори миллат» конфронси илмӣ оммавӣ доир гардид. Директори Китобхонаи миллии Тоҷикистон профессор Сайфиддин Назарзода ба моҳият ва унсурҳои асосии Ваҳдати миллӣ таъкид намуда, гуфт: «Нуздаҳ сол қабл, яъне бисту ҳафтуми июни соли 1997 баъди музокироти тўлонӣ ба хотири ҳифзи якпорчагии марзу буми кишвар, таъмини сулҳу субот, сарҷамъии миллат ва зиндагии ороми сокинони мамлакат Созишномаи умумии истиқрори сулҳ ва ризоияти миллӣ дар Тоҷикистон ба имзо расид, ки ин санади муҳим дар таърихи навини халқамон аз ҷумлаи асноди сарнавиштсоз ба ҳисоб меравад».
Раиси Шўрои Ҳаракати ваҳдати миллӣ ва эҳёи Тоҷикистон Мирзошоҳрух Асрорӣ дар мавзўи «Дурнамои таҳким ва ҳифзи ваҳдати миллӣ дар замони муосир» зикр кард, ки: «Ваҳдати миллӣ дастоварди бузурге гардид, ки кишвари тозаистиқлоли моро аз хатари парокандашавӣ наҷот дод. Дар ҷараёни таҳаққуқи оштии миллӣ аз ҷониби Президенти мамлакат муҳтарам Эмомалӣ Раҳмон сиёсати нав, сиёсати ваҳдати миллӣ ба миён омад, ки мебоист ҷомеаи моро ба ҳамин дараҷаи нави сифатӣ расонад».
Инчунин маърўзаҳои дастгоҳи Кумитаи иҷроияи марказии Ҳизби халқии демократии Тоҷикистон Абдураҳмон Хонов дар мавзўи «Омилҳои таҳкимбахшандаи Ваҳдати миллӣ» ва муовини фармондеҳи қувваҳои ҳарбӣҳавоӣ ва мудофиаи зиддиҳавоии Қувваҳои мусаллаҳи Ҷумҳурии Тоҷикистон оид ба корҳои сиёсӣ тарбиявӣ Абдурашид Холбоев «Ваҳдат-созандагию ободкорист» шунида шуданд.
АМИТ «Ховар»