Мулоқоти сардори Хадамоти муҳоҷират Т. Каримзода бо раиси ҷамъияти «Ҳамватан» — и вилояти Иркутск М. Маликшоев

Масъалаи пурзӯр намудани корҳои иттилотию фаҳмондадиҳӣ дар байни шаҳрвандон-муҳоҷирони меҳнатӣ пеш аз сафар ба кишвари Русия ва баланд бардоштани сатҳи огоҳии шаҳрвандон оид ба қонунгузориҳои нави Федератсияи Русия дар самти муҳоҷирати меҳнатӣ зимни мулоқоти сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон Тоҳир Каримзода бо раиси ҷамъияти миллӣ — фарҳангии тоҷикон бо номи «Ҳамватан» — и вилояти Иркутск Муриват Маликшоев мавриди баррасӣ қарор дода шуд.
Тоҳир Каримзода аз таваҷҷуҳ ва ғамхории Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон нисбат ба ҷамъиятҳо ва ҳамватанони бурунмарзӣ ёдовар шуда, доир ба проблемаҳои муҳоҷирати меҳнатӣ, риояи урфу одат, расму ойин, анъана ва суннатҳо, донистани қонуну қоидаҳои будубоши кишвари қабулкунанда, баланд бардоштани сатҳи маърифати ҳуқуқӣ ва ҳимояи манфиатҳои муҳоҷирони меҳнатӣ дар Федератсияи Русия, ба вижа вилояти Иркутск таъкид намуд.
Зикр  шуд, ки баъд аз баргузории  мулоқотҳо бо ахолии кишвар дар шаҳру ноҳияҳо ва вилоятҳо сатҳи огоҳии шаҳрвандон — муҳоҷирони меҳнатии тоҷик боло рафта, мақомоти дахлдори Федератсияи Русия низ ин матлабро борҳо иброз доштаанд.
Инчунин ҷонибҳо ба масъалаи  дурнамои ҳамкории Хадамоти муҳоҷират бо ҷамъиятҳо ва ҳамватанони бурунмарзӣ ва саҳми онҳо дар рушди иқтисодиёти мамлакат таваҷҷуҳ зоҳир карданд.
Сипас, раиси ҷамъияти миллӣ — фарҳангии тоҷикон бо номи «Ҳамватан»-и вилояти Иркутск Муриват Маликшоев аз Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе дидан намуд.

АМИТ «Ховар»

Tags: