Шурӯъ аз дирӯз, 25 октябри соли равон бинобар сабаби қатъ гардидани фаъолияти таваққуфгоҳи «Роҳи сафед»-и ноҳияи Шоҳмансури шаҳри Душанбе (маҳаллаи 7 км) ҳаракати воситаҳои нақлиёти мусофирбар — таксиҳо ба шаҳру ноҳияҳои самти минтақаи Кӯлоб ва водии Рашт (Файзобод, Роғун, Нуробод, Рашт, Сангвор, Тоҷикобод ва Лахш) тавассути «Терминали шарқӣ» (маҳаллаи Обшорон) ба роҳ монда мешавад.
Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе хабар доданд, ин икдом бо мақсади ба танзим даровардани ҳаракати нақлиёт, аз ҷумла, мусофиркашонӣ ва танба нагардидани роҳ дар минтақаи мазкур амалӣ мешавад. Мусофирон минбаъд метавонанд барои сафар ба шаҳру ноҳияҳои самти минтақаҳои зикршуда аз «Терминали шарқӣ» (охири хатсайрҳои автобусҳои №№2, 7, 43 ва микроавтобусҳои №№5А, 15, 18 ва 39) истифода баранд. Дар Терминали мазкур барои мусофирон ва ронандагон шароити зарурӣ муҳайё гардидааст.
Ёдовар мешавем, ки сохтмони «Терминали шарқӣ» дар даромадгоҳи қисмати шарқии шаҳри Душанбе нимаи дуюми соли 2015 оғоз гардида, аз ҷониби ҶДММ «Озод интернейшнл» дар зарфи ду сол ба истифода дода шуд ва дар корҳои бунёдии он беш аз 50 нафар сокинони маҳаллӣ иштирок намуданд.
«Терминали шарқӣ» дар майдони 1,48 гектар ҷойгир буда, аз таваққуфгоҳ бо ғунҷоиши то 300 адад воситаи нақлиёти гуногунҳаҷм, бинои маъмурӣ, нуқтаи шустушӯ ва таъмири воситаҳои нақлиёт иборат мебошад.
Маблағи лоиҳавии иншоот 3 миллиону 938 ҳазор сомониро ташкил медиҳад, ки аз ин ҳисоб 1 миллиону 181 ҳазор сомонӣ барои харид ва дастрас кардани таҷҳизоту воситаҳои техникӣ равона гардидааст.
Бинои асосии терминал аз се ошёна иборат буда, дар ошёнаи аввал толори интизорӣ бо ғунҷоиши то 90 нафар дар як вақт, ошхона барои 60 нафар, нуқтаи муоинаи тиббӣ, хонаи модару кӯдак ва дигар утоқҳои корӣ ҷойгиранд.
Бояд илова кард, ки оғози ҳаракати 7 хатсайри нақлиёти мусофирбари шаҳрӣ, аз ҷумла автобусҳои рақамҳои 2, 7, инчунин микроавтобусҳои №2, №15, №5а, №18, ва 39, ки ба сокинону меҳмонони шаҳри Душанбе хизмат мерасонанд, аз ҳамин маҳал сарчашма мегирад.
Фаъолияти терминал ба таври шабонарӯзӣ ба роҳ монда шуда, барои мусофирону ронандагон имкониятҳои мусоид фароҳам оварда шудаанд. Аз ҷумла, дар ошёнаҳои дуюму сеюми бинои асосии терминал 15 ҳуҷраи хоби яккаса ва оилавӣ барои 35 нафар бо шароити олӣ ва миёна мавҷуданд, ки шаҳрвандон дар ҳолатҳои зарурӣ аз онҳо истифода мекунанд.
Дар як қисмати терминал нуқтаи фурӯши сӯзишворӣ ҳам бунёд гардидааст, ки ба муштариён хизматрасонии босифат пешкаш месозад. Дар маҷмӯъ, бо оғози фаъолияти терминали мусофирбарӣ аз 35 то 40 нафар бо кори доимӣ таъмин гардиданд.