Рӯзҳои наздик экспедитсияи илмӣ-тадқиқотии Академияи илмҳои Ҷумҳурии Тоҷикистон ба кӯли Сарез меравад. Ҳадаф аз таъсиси чунин гурӯҳи корӣ баррасии вазъи кӯл буда, ин мавзеъ аз нигоҳи олимони зилзилашинос таҳқиқ мешавад.
Дар ин бора аз Академияи илмҳои Ҷумҳурии Тоҷикистон ба АМИТ «Ховар» иттилоъ доданд.
Ҳайати мазкур аз 15 нафар иборат буда, ба он ду нафар-Ю.Мамадҷонов ва М.Сафаров ба намояндагӣ аз Маркази илмӣ-таҳқиқотии экология ва муҳити зисти Осиёи Марказӣ (Душанбе) – и Академияи илмҳои Ҷумҳурии Тоҷикистон ва Академияи илмҳои Чин, Ф. Шаймуродов аз Институти масъалаҳои об, гидроэнергетика ва экологияи Академияи илмҳои ҶТ, Ш.Я. Муродқулов аз Институти геология, сохтмони ба заминҷунбӣ тобовар ва сейсмологияи Академияи илмҳои ҶТ, А. Дарғаев аз Агентии гидрометеорологияи Кумитаи ҳифзи муҳити зисти назди Ҳукумати ҶТ, М. Муборакшоев ва М. Насриддинова аз Кумитаи ҳолатҳои фавқулода ва мудофиаи граждании назди Ҳукумати ҶТ шомил мебошанд.
Дар ин ҳайат 8 нафарро шаҳрвандони Чин — намояндаҳои Институти хатарҳои кӯҳӣ ва муҳити зисти Академияи илмҳои Ҷумҳурии Чин ва Институти Синзянии экология ва географияи Академияи илмҳои Чин ташкил медиҳанд.
Ёдовар мешавем, ки кӯли Сарез – яке аз муъҷизаҳои табат ва дурдонаҳои сайёҳии Тоҷикистон аст, ки соли 1901 ба вуҷуд омадааст ва то ба имрӯз бо андоза ва зебоии нотакрори худ диққати аҳли оламро мутаваҷҷеҳ сохтааст. Он дар ҳудуди ноҳияҳои Рӯшон ва Мурғоби Вилояти Мухтори Кӯҳистони Бадахшон, дар баландии 3250 метр аз сатҳи баҳр воқеъ аст.
Дарозии кӯли Сарез 62 км, паҳнояш 3,3 км буда, жарфояш то 500 метр аст. Ҳаҷми оби он 17 миллиард метри мукааб буда, вазнаш ба ҳисоби миёна 19 миллион тоннаро ташкил медиҳад.
АМИТ «Ховар»