Иттифоқи композиторони Тоҷикистон тасмим гирифтааст, ки то 9 январ бахшида ба 80-солагии Иттифоқи мазкур бо иштироки оҳангсозони ҷавон барномаҳои мусиқӣ доир намояд. Дар робита ба ин имрӯз дар Мактаб-интернати миёнаи махсуси ҷумҳуриявии ба номи З. Шаҳидӣ барномаи мусиқӣ ва маҳфили эҷодии аъзои Иттифоқи композиторони ҷавон баргузор мегардад.
Тавре ба хабарнигори АМИТ «Ховар» Раиси Иттифоқи композиторони Тоҷикистон Хуршед Низомов иттилоъ дод, бо мақсади роҳандозии барномаҳои тахассусии мусиқии таълимии телевизионӣ, тасмим гирифта шуд, ки барномаҳои эҷодии оҳангсозони ҷавон доир карда шавад. Ин иқдом бо мақсади тарғиби мусиқии касбӣ ва фароҳам овардани шароит барои татбиқи имкониятҳои эҷодии наврасону ҷавонон равона шудааст.
Зикр гардид, ки тавассути баргузории ин барномаҳо ташаккули низоми самарабахши ҳавасмандгардонии неруи эҷодӣ барои эҷоди асарҳои баландмазмуни замонавӣ, ки ғояи асосии онро тарғибу ташвиқи дастовардҳои Истиқлолияти давлатӣ, Ваҳдати миллӣ, якпорчагии Тоҷикистон, анъанаҳои гаронарзиши миллӣ, ифтихор аз Ватан ва мероси пурғановати ниёгон ташкил медиҳад, тарғиб карда мешавад.
Мавсуф иброз дошт, ки дар барномаи имрӯза бо иштироки Убайдуллои Иброҳимзода доир гардид. Ҳамчунин дар нақша аст, ки лектории мусиқиии асарҳои эҷонднамудаии композиторони ҷавон Ҷасур Халилов, гирандаи Шоҳҷоизаи Озмуни ҷумҳуриявии «Тоҷикистон — Ватани азизи ман» Зафар Раҳимӣ ва Фарҳод Зикири пешниҳод гардад.
Ёдовар мешавем, ки мусиқии тоҷик дар даврони соҳибистиқлолии мамлакат хеле тараққӣ намуда, на танҳо дар дохили ҷумҳурӣ, балки дар арсаи ҷаҳонӣ тоҷиконро чун мардуми санъатдӯсту соҳиби фарҳанги бой муаррифӣ намудааст.
АМИТ «Ховар»