2 октябри соли 2016 таҳти роҳбарии Қосим Роҳбар, раиси Кумитаи рушди маҳали назди Президенти Ҷумҳурии Тоҷикистон ва бо иштироки намояндагони Дастгоҳи иҷроияи Президенти Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Шуъбаи ҳифзи муҳити зисти шаҳри Турсунзода, Шуъбаи истифодабарии хоҷагии манзилию коммуналӣ, гармидиҳӣ ва механикии Корхонаи воҳиди давлатии «Хоҷагии манзилию коммуналӣ», Мақомоти иҷроияи ҳокимияти давлатии шаҳри Турсунзода, Муассисаи коммуналии «Шуъбаи манзилию коммуналии назди мақомоти иҷроияи ҳокимияти давлатии шаҳри Турсунзода» ва гурўҳи татбиқи лоиҳаи «Идоракунии партовҳои сахти маишӣ дар шаҳри Турсунзода» ҷаласаи ҳайати мушовара доир гардид. Дар ҷаласа натиҷаҳои таҳлили ҷараёни татбиқи лоиҳаи «Идоракунии партовҳои сахти маишии шаҳри Турсунзода», ҳамчунин ҷамъбасти натиҷаҳои фаъолияти Кумитаи рушди маҳали назди Президенти Ҷумҳурии Тоҷикистон дар нуҳ моҳи соли 2016 ва вазифаҳои минбаъдаи воҳидҳои сохтории дастгоҳи марказии Кумита барои давраи то моҳи январи соли 2017 баррасӣ гардиданд.
Раиси Кумита нисбат ба ҷараёни татбиқи лоиҳаи мазкур баррасӣ ва таҳлили масъалаҳои зеринро муҳим арзёбӣ намуд:
дуруст ба роҳ мондани масъалаи нархгузорӣ ва маблағгузорӣ, аз ҷумла низоми нархгузорӣ, пӯшонидани қарзҳо аз рӯи муҳлати муқарраршудаи бонк, амортизатсия, ҷамъоварӣ ва азхудкунии маблағҳо ва ғайра.
Дар раванди ҳалли масъалаҳои мазкур Қосим Роҳбар мавқеи Кумитаро дар доираи вазифаҳои низомномавӣ возеҳ шарҳ дода, иброз дошт, ки пешниҳоду таклифҳо ва ҳамоҳангсозии тадбирҳо оид ба рушди инноватсионӣ, технологияи пешқадам, бахши манзилию коммуналӣ дар маҳал, соҳаи идоракунии партовҳои сахти маишӣ, ҳамоҳангсозии фаъолияти мақомоти марказӣ ва маҳаллии ҳокимияти давлатӣ дар бораи татбиқи мақсад ва вазифаҳои стратегии рушди маҳал, беҳтар намудани сифати хизматрасонӣ, нобудкунии партовҳо, таҳия намудани тавсияҳо ҷиҳати фаъол гардонидани меъёри иқтисодии минтақаҳо, ҷалби дороиҳо ва захираҳои мавҷуда, коркарди дуюмдараҷа роҳандозӣ шаванд.
Қосим Роҳбар ҷамъбасти натиҷаҳои фаъолияти Кумитаи рушди маҳали назди Президенти Ҷумҳурии Тоҷикистон дар нуҳ моҳи соли 2016–ро муҳокима намуда, вобаста ба вазифаҳои минбаъда ба воҳидҳои сохтории дастгоҳи марказии Кумита дастуру супоришҳо дод.
АМИТ «Ховар»