Дар Суғд 7 толори варзишӣ ва 25 майдончаи варзишӣ мавриди истифода қарор гирифтанд

Ба истиқболи ҷашни 30-солагии Истиқлоли давлатии Ҷумҳурии Тоҷикистон дар шаҳру ноҳияҳои вилояти Суғд аз оғози сол то имрӯз аз ҳисоби маблағҳои буҷети маҳаллӣ ва саҳми соҳибкорон 7 толори варзишӣ, 25 майдончаи варзишӣ ва 1 ҳавзи шиноварӣ  бунёд ва мавриди истифода қарор гирифтанд.

Тавре аз хадамоти матбуоти Раиси вилояти Суғд ба АМИТ «Ховар» иттилоъ доданд,  дар доираи омодагиҳо ба ҷашни таърихӣ бунёд ва таъмиру тармими даҳҳо иншооти варзишӣ низ пешбинӣ гардидааст, ки ба рушди соҳаи варзиш ва таъмини солимии ҷомеа мусоидат мекунанд.

Ҳоло дар ҳудуди  вилояти Суғд  2668 иншооти варзишӣ, аз ҷумла 46 варзишгоҳ, 1842 майдончаи варзишӣ, 565 толори варзишӣ, 34 ҳавзи шиноварӣ ва 181 маҷмааю иншооти махсуси варзишӣ, аз қабили тир, боулинг, фитнес ва клубҳои ихтиёрӣ фаъолият доранд, ки шаҳрвандон аз иншооти мазкур самаранок истифода мебаранд.

АМИТ «Ховар»

Tags: