Аз 3 то 5 апрели соли равон дар Тоҷикистон оид ба тавсеаи ҷараёни ҳамгироии кишварҳои Осиёи Марказӣ маҳфилҳои байналмилалӣ баргузор мегарданд. Тибқи иттилои расмии намояндаи Сафорати Федератсияи Россия дар Тоҷикистон, ин маҳфилҳо бо ташаббуси ташкилоти ҷамъиятии «Пажӯҳишгоҳи тадқиқоти Авруосиёӣ», Намояндаи тиҷоратии Федератсияи Россия дар Тоҷикистон ва дастгирии Сафорати Россия амалӣ мешаванд. Аз ҷумла, 3 апрел дар Донишгоҳи давлатии Хуҷанд ба номи академик Б. Ғафуров ва 4 апрел дар бинои «Душанбе-Плаза» дар мавзӯи «Имкониятҳои ҳамкории иқтисодӣ ва гуманитарии Тоҷикистон бо кишварҳои лоиҳаи ҳамгироии АвруОсиё» ҳамоишҳо баргузор мегарданд. Ҳамчунин 5 апрел дар маркази вилояти Хатлон — шаҳри Қурғонтеппа дар толори Донишкадаи давлатии энергетикии Тоҷикистон оид ба «Амният ва суботи иқтисодии Тоҷикистон дар партави рушди тавсеаи Авруосиёӣ» барпо намудани маҳфили коршиносон дар назар дошта шудааст.
Дар маҳфилҳо намояндагони мақомоти расмии ҳокимияти давлатӣ, дипломатҳо, сиёсатшиносон, олимону коршиносон, кормандони ВАО-и Россия, Қазоқистон, Қирғизистон ва дигар кишварҳои минтақа иштирок мекунанд. Дар назар дошта шудааст, ки иштирокдорони ҳамоишҳо мухталифи ҷараёни ҳамгироӣ, мушкилоти мавҷуда ва дигар омилҳоеро, ки садди роҳи ҳамгироии кишварҳо шудаанд, мавриди баррасӣ қарор дода, роҳҳои беҳтар ва барои ҳамаи кишварҳо судмандро таҳия ва пешниҳод мекунанд. Боз ҳам беҳтар намудани муносибатҳои тиҷоративу иқтисодии Тоҷикистону Россия дар партави тавсеаи ҷараёни ҳамгироии кишварҳои минтақа аз мавзӯъҳои асосии ҳамоишҳои мазкур дониста шудааст.
АМИТ «Ховар»