26 октябр бо ташаббуси Вазорати кишоварзии Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе дар Маҷмааи савдои «Меҳргон»-и шаҳри Душанбе Фестивал-намоиши шолӣ ва биринҷ баргузор мегардад.
Дар ин бора котиби матбуоти Вазорати кишоварзии Ҷумҳурии Тоҷикистон Ёқубҷон Уроқов ба хабарнигори АМИТ «Ховар» иттилоъ дод.
Дар фестивал аз тамоми шаҳру навоҳии мамлакат навъҳои гуногуни биринҷ ба намоиш- фурӯш гузошта мешаванд.
Бояд гуфт, ки дар фестивал-намоиши мазкур намояндагони Вазорати кишоварзӣ, Мақомоти иҷроияи ҳокимияти давлатии шаҳри Душанбе, Академияи илмҳои кишоварзӣ, Донишкадаи аграрии Тоҷикистон, кишоварзон, меҳмонону сокинони пойтахт иштирок мекунанд.
Бино ба иттилои манбаъ, дар Фестивал-намоиши шолӣ ва биринҷ деҳқононе, ки ба тухмипарварӣ машғул буда, хоҷагиҳои кишоварзии мамлакатро бо навъҳои гуногуни ғалладонагӣ таъмин мекунанд, маҳсулоти худро ба намоиш-фурӯш мегузоранд.
Ҳамчунин дар фестивал таомҳои миллии аз биринҷ омодагашта, хони миллӣ, гӯшаи анъанаҳои миллӣ ва барномаи фарҳангӣ доир мегардад. Дар намоишгоҳ гӯшаи тавсияҳо фаъол гардонида мешавад. Дар он олимони Академияи илмҳои кишоварзӣ ба харидорон доир ба навъҳои биринҷ ва ба хоҷагиҳои кишоварзӣ оид ба парвариши биринҷ тавсияҳо медиҳанд.
Дар Фестивал-намоиши шолӣ ва биринҷ аз рӯйи чор номинатсия озмун гузаронида шуда, ба иштирокчиён ифтихорнома ва туҳфаҳои Вазорати кишоварзӣ тақдим мегарданд.
Бояд тазаккур дод, ки биринҷ растании зироатӣ буда, дар заминҳои обдор кишт карда мешавад. Он аксаран дар даруни об рӯида, дар об месабзаду мерасад.
Биринҷ маҳсулотест, ки дорои витаминҳои зиёд буда, организми инсонро як хел нигоҳ медорад. Он аз ҷумлаи донагиҳои хеле фоидаовар буда, ба гурӯҳи маҳсулоти табобатӣ дохил мешавад.
Истифодаи мунтазами маҳсулоти биринҷӣ хавфи гирифтор шудан ба бемории саратони рӯдаро камтар мекунад. Биринҷ сарчашмаи баъзе витаминҳои гурӯҳи Б мебошад. Витаминҳои гурӯҳи Б асабро ором намуда, ба пӯст беҳбудӣ бахшида, нохун ва мӯйи сарро нигоҳ медоранд.
Табибон тавсия медиҳанд, ки истеъмоли зиёди биринҷ ранги рӯйро пок менамояд, умрро дароз карда, дар бадан моддаҳои солим пайдо мекунад.
АМИТ «Ховар»