Шоми 26-уми августи соли равон варзишгари маъруфи тоҷик Дилшод Назаров дар 18-умин Бозиҳои тобистонаи Осиё дар шаҳри Ҷакартаи Индонезия дар намуди гурзандозӣ бо натиҷаи 74 метру 16 сантиметр мақоми дуюмро ишғол кард, ки ин аввалин медали дастаи мунтахаби Тоҷикистон мебошад.
Тавре ба хабарнигори АМИТ «Ховар» аз Кумитаи миллии олимпии Тоҷикистон хабар доданд, қаҳрамони Бозиҳои олимпии соли 2016 Дилшод Назарови 36-сола дар мусобиқаи ниҳоии гурзандозӣ миёни мардон, ки дар варзишгоҳи «Gelora Bung Karno Main Stadium»-и пойтахти Индонезия — шаҳри Ҷакарта бо ширкати 12 варзишгар баргузор шуд, бо медали нуқраи 18-умин Бозиҳои тобистонаи Осиё сарфароз гашт.
Ҷойи аввал ва медали тиллои 18-умин Бозиҳои тобистонаи Осиёро Ашраф Ал-Cайфии 23-сола аз Қатар бо натиҷаи 76 метру 88 сантиметр соҳиб гашт. Варзишгари дигари тоҷик Сӯҳроб Хоҷаеви 25-сола, ки Ӯзбекистонро намояндагӣ намуд, бо натиҷаи 74 метру 6 сантиметр ҷойи сеюмро касб намуд, ки ин натиҷаи беҳтарини ӯ дар мавсими имсола мебошад.
Ба ҷуз Дилшод Назаров ба дастаи Тоҷикистон шогирдаш Абдурауф Мӯсоеви 22-сола дохил буд. Ӯ бо натиҷаи 58 метру 95 сантиметр ҷойи пеш аз охирин — ёздаҳумро гирифт.
Дар сабқати гурзандозӣ миёни мардон 12 варзишгар дунафарӣ аз Қатар, Тоҷикистон ва Чин, якнафарӣ аз Индонезия, Кореяи Ҷанубӣ, Малайзия, Тайланд, Ӯзбекистон ва Эрон иштирок доштанд.
Ёдовар мешавем, ки дар 18-умин Бозиҳои тобистонаи осиёӣ дастаи мунтахаби Чин бо касби 174 медал (78 тилло, 59 нуқра ва 37 биринҷӣ) мақоми аввалро касб намудааст. Дастаи мунтахаби Ҷопон бо касби 122 медал (40-34-48) дар мақоми дуюм ва дастаи мунтахаби Кореяи Ҷанубӣ бо касби 94 медал (27-30-37) дар мақоми сеюм қарор доранд. Дастаи мунтахаби Тоҷикистон бо дарёфти як нишони нуқра дар мақоми 32-юм ҷой дорад.
АМИТ«Ховар»