Пагоҳ дар ҷумҳурӣ тағйирёбии якбораи обу ҳаво дар назар дошта шудааст. Дар баъзе аз ноҳияҳои вилояти Суғд вазиши сахти бод аз тарафи шимолу ғарб то 17-22 метр дар як сония пешбинӣ шуда, дар бархе ҷойҳои вилояти Хатлон ва ноҳияҳои тобеи марказ шамол то 15-20 метр дар як сония мевазад. Ҳамзамон ба амал омадани чангу ғубор пешгӯӣ мешавад. Дар водиҳо ҳарорати рӯзона паст гардида, ба 8-13 дараҷа мерасад. Дар ин бора аз Агентии обуҳавошиносии Тоҷикистон хабар доданд.
Имрӯз, 17 октябр обуҳавошиносони кишвар дар вилояти Хатлон ҳавои камабри бебориш ва ба амал омадани чангу ғуборро пешгӯӣ менамоянд. Дар водиҳо ҳарорат баланд гардида, рӯзона ба 27-32 дараҷа мерасад. Дар ин минтақа шамол аз самти шарқ дар як сония 3-8 метр мевазад.
Дар Вилояти Мухтори Кӯҳистони Бадахшон ҳавои тағйирёбандаи ноустувор пешбинӣ мегардад. Дар ғарби вилоят ҳарорат рӯзона 18-23 ва дар шарқи ҳамин вилоят 6-11 дараҷаро ташкил хоҳад дод.
Обуҳавошиносон дар вилояти Суғд ҳавои тағйирёбандаи абриро пешгӯӣ менамоянд. Дар ноҳияҳои вилоят вазиши сахти шамол ба амал омада, суръати он дар баъзе ноҳияҳо ба 20-25 метр дар як сония мерасад. Ҳарорати ҳаво дар водиҳо шабона 7-12 ва рӯзона 24-29 дараҷаро ташкил медиҳад.
Дар ноҳияҳои тобеи марказ ҳаво абрӣ гашта, ҳарорат дар водиҳо шабона ба 5-10 ва рӯзона ба 26-31 дараҷа мерасад.
Обуҳавошиносон дар шаҳри Душанбе ҳавои тағйирёбандаи бебориш пешгӯӣ менамоянд. Шамол аз самти ғарб 2-7 метр дар як сония вазида, ҳарорати ҳаво шабона 6-8 ва рӯзона 29-31 дараҷа гарм мешавад.
АМИТ "Ховар"