Aгентии назорати давлатии молиявӣ ва мубориза бо коррупсияи Ҷумҳурии Тоҷикистон давоми соли 2017 ҷиҳати иҷрои Қонун «Дар бораи мубориза бар зидди коррупсия», ки хизмати якҷоя ва таъйини хешовандони наздик ба мансабҳои давлатӣ ё ба онҳо баробаркардашударо манъ намудааст, санҷишҳо гузаронида, 35 ҳолати вайрон намудани талаботи Қонуни мазкурро ошкор кард. Ин нуктаро муовини аввали директори Aгентии назорати давлатии молиявӣ ва мубориза бо коррупсия Абдукарим Зарифзода зимни нишасти матбуотӣ, ки субҳи имрӯз бо иштироки намояндагони ВАО баргузор гардид, баён дошт. Кормандони Агентӣ ҳамчунин дар якҷоягӣ бо масъулини комиссияҳои танзими анъана ва ҷашну маросимҳо ҷиҳати таъмини иҷрои Қонун «Дар бораи танзими анъана ва ҷашну маросимҳо дар Ҷумҳурии Тоҷикистон» 284 ҳолати қонуншиканиро ошкор намуданд.
Тавре Абдукарим Зарифзода иттилоъ дод, аз тарафи воҳидҳои ҳифзи ҳуқуқи Агентӣ дар давраи сипаришуда 1980 адад ҷиноятҳои коррупсионӣ, иқтисодии дорои хусусияти коррупсионӣ ва ҷиноятҳои бо андоз алоқаманд ошкор карда шуданд, ки 650 адади он ба гурӯҳи ҷиноятҳои вазнин шомиланд. Аз шумораи умумии ҷиноятҳои ошкоршуда 442 адади он ҷиноятҳои азонихудкунӣ ва исрофкорӣ ба ҳисоб рафта, 112 адад ҷиноятҳои марбут ба тасарруфи маблағҳои калон мебошанд. Илова бар ин, 636 ҷиноятҳои қаллобӣ, 22 ҷинояти саркашӣ аз супоридану пардохти андозҳо, 104 ҷиноят вобаста ба гирифтан ва додани пора, ришвадиҳии тиҷоратӣ ва гирифтани мукофот бо роҳи тамаъҷӯӣ муайян ва ошкор гардиданд.
Зимни нишасти матбуотӣ зикр карда шуд, ки дар вазорату идораҳо, мақомоти маҳаллии ҳокимияти давлатӣ, марказҳои идораи барномаҳои аз тарафи ташкилотҳои байналхалқии молиявӣ маблағгузоришаванда, субъектҳои хоҷагидории давлатӣ ва дигар муассисаҳои буҷетӣ 954 тафтишу санҷишҳои молиявӣ гузаронида шуда, ба маблағи зиёда аз 548 миллион сомонӣ зарари молиявӣ ошкор гардидааст. Инчунин зимни тафтишу санҷишҳои молиявӣ 282,5 млн. сомонӣ, аз ҷумла, ба буҷет 139,7 млн. сомонӣ ва ба корхонаҳо ва муассисаҳо 142,8 млн. сомонӣ барқарор карда шудааст.
Дар нишасти матбуотии Aгентии назорати давлатии молиявӣ ва мубориза бо коррупсия мушовири калони бахши Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Содиқ Шоназаров иштирок намуд.
АМИТ "Ховар"