Аз 29 то 31 марти соли равон дар шаҳри Душанбе Намоишгоҳи байналмилалии универсиалии «Тоҷикистон- 2018» баргузор мегардад, ки дар он дар радифи корхонаю ширкатҳои тавлидотии Тоҷикистон, инчунин ширкатҳои истеҳсолӣ ва сармоягузории кишварҳои хориҷӣ ширкат менамоянд.
Дар ин хусус ба намояндагони расонаҳои хабарӣ раиси Палатаи савдо ва саноати Ҷумҳурии Тоҷикистон Шариф Саид 29 январ дар ҷараёни нишасти матбуотӣ иттилоъ дод. Мавсуф аз фаъолияти Палатаи савдо ва саноати Ҷумҳурии Тоҷикистон дар соли сипаригардида натиҷагирӣ намуда, зикр сохт, ки Палатаи савдо ва саноати Ҷумҳурии Тоҷикистон дар ин давра бо мақсади рушди иқтисодиёти миллӣ бо палатаҳои савдо ва доираҳои соҳибкорони кишварҳои хориҷӣ ҳамкориро тақвият дода, беш аз 350 вохӯрӣ ва 21 форуми доираҳои соҳибкорӣ баргузор намуд.
Ҳамзамон Палатаи савдо бо мақсади муаррифии молу маҳсулоти ватанӣ соли 2017 бо дастгирии Ҳукумати Ҷумҳурии Тоҷикистон дар шаҳри Душанбе ва минтақаҳои ҷумҳурӣ, инчунин дар хориҷи мамлакат беш аз 30 намоишгоҳ ташкил намуд. Баргузории молҳои истеҳсолии Ҷумҳурии Тоҷикистон дар пойтахти Ӯзбекистон- шаҳри Тошканд шаҳодати ин гуфтаҳост. Дар ин намоишгоҳ 130 корхонаю ширкатҳои истеҳсолӣ ва 300 нафар соҳибкорони Тоҷикистон молу маҳсулоти тавлидотии худро ба намоиш гузоштанд.
Бо дахли баланд бардоштани савияи касбӣ ва сатҳи дониши кормандони бахши хусусии ҷумҳурӣ раиси Палатаи савдо ва саноати ҷумҳурӣ зикр кард, ки дар ин самт семинару конфронс, тренинг ва хизматрасонии иттилоотӣ ташкил карда мешаванд.
АМИТ "Ховар"