Ба шаҳри Хуҷанд 25 адад автобусҳои замонавии истеҳсоли Россия ворид карда шуданд

Ба шаҳри Хуҷанд ҷиҳати беҳтар гардидани сатҳи хизматрасонӣ ва аз байн бардоштани мушкилоти мавҷуда 25 адад автобусҳои замонавии истеҳсоли Федератсияи Россия ворид карда шуданд.

Тавре аз Хадамоти матбуоти раиси вилояти Суғд ба АМИТ «Ховар» хабар доданд, ин иқдом бо дастгирии Ҳукумати Ҷумҳурии Тоҷикистон дар доираи лоиҳаи «Рушди нақлиёти ҷамъиятии шаҳри Хуҷанд» бо маблағгузории Бонки аврупоии таҷдид ва рушд амалӣ гардид.

Таъкид шуд, ки бо татбиқи пурраи лоиҳаи «Рушди нақлиёти ҷамъиятии шаҳри Хуҷанд» ба маркази вилоят дар маҷмӯъ 100 адад автобус ворид карда мешаванд. Дар марҳилаи аввал 25 автобус оварда шуд. Татбиқи лоиҳаи мазкур ва харидории нақлиёти мусофиркашон ба беҳтар гардидани сатҳи хизматрасонӣ ба мусофирон мусоидат хоҳад кард.

Автобусҳои воридшуда ҷавобгӯи талаботи замони муосир буда, ҳар кадоми он дар як вақт метавонад беш аз 70 мусофирро ба манзил расонад.

Тибқи иттилои масъулин, автобусҳо дар 10 хатсайр ҳаракат мекунанд.

АМИТ «Ховар»