ТВТ.02.07.2022. ЮНЕСКО омода аст дар дилхоҳ самт ҷиҳати рушди соҳаи маориф дар Тоҷикистон мусоидат намояд. Дар ин бора АМИТ «Ховар» бо истинод ба Вазорати маориф ва илми Ҷумҳурии Тоҷикистон хабар медиҳад.
Дар бошишгоҳи ЮНЕСКО дар шаҳри Парижи Фаронса Вазири маориф ва илми Ҷумҳурии Тоҷикистон Раҳим Саидзода бо роҳбари Шӯрои иҷроияи ЮНЕСКО Тамара Растовак Сиавишвили мулоқот намуд.
Дар мулоқот вобаста ба масъалаҳои шиносоии иштироки ҳайати Тоҷикистон дар Саммити муқаддимотии вазирони маорифи кишварҳои дунё ва рушди соҳаи маорифи Тоҷикистон мавриди баррасӣ қарор гирифтанд.
Зимни суҳбат Раҳим Саидзода аз дастгириҳои пайвастаи Президенти Ҷумҳурии Тоҷикистон ва Ҳукумати мамлакат нисбат ба соҳаи маориф ва дастовардҳои соҳаи маориф дар солҳои соҳибистиқлолӣ маълумоти муфассал дод.
Тамара Растовак Сиавишвили иброз дошт, ки иштирок дар Саммит имкони мусоид барои шиносоӣ аз ҷараёни трансформатсияи соҳаи маориф дар дунё ва ироаи таҷрибаи Тоҷикистон дар ин самт мебошад.
Дар идомаи суҳбат мавсуф бо хушнудӣ ва ёдоварӣ аз рӯзҳои фарҳангии Тоҷикистон дар Фаронса ва саҳми арзандаи Президенти мамлакат, Пешвои миллат муҳтарам Эмомалӣ Раҳмон дар рушди соҳаҳои маорифу фарҳанг ва ҳамкории Тоҷикистону ЮНЕСКО зикр кард, ки чунин муносибат ва таваҷҷуҳ зоҳир кардан намунаи беҳтарини Роҳбари олии як давлат ба масъалаҳои зикршуда мебошад.
Дар вохӯрӣ инчунин масъалаҳои рақамикунонии соҳаи маориф ва трансформатсияи соҳаи маориф мавриди баррасии ҷонибҳо қарор гирифтанд.
Раҳим Саидзода аз таъсиси Маркази инноватсионии Донишкадаи ҷумҳуриявии такмили ихтисос ва бозомӯзии кормандони соҳаи маориф бо иштироки муовини Дабири кулли СММ хонум Амина Муҳаммад ёдовар шуда, зикр кард, ки Вазорати маориф ва илм омода аст ҷиҳати рушди ҳамкорӣ тамоми тадбирҳои судмандро роҳандозӣ намояд.
Тамара Растовак Сиавишвили аз вохӯрии худ бо Президенти Ҷумҳурии Тоҷикистон муҳтарам Эмомалӣ Раҳмон бо хушнудӣ ёдовар шуда, зикр кард, ки тамоми ташаббусҳои Тоҷикистонро дастгирӣ намуда, омода аст дар дилхоҳ самт ҷиҳати рушди соҳаи маориф дар Тоҷикистон мусоидат намояд.
Манбаъ: АМИТ «Ховар»