Бегоҳии дирӯз дар Муассисаи давлатии «Душанбе Плаза» бахшида ба Рўзи варзишгарони Тоҷикистон бо иштироки собиқадорони варзиш, мураббиён, варзишгарони маъруфи пойтахт ва ҷоизадорону ғолибони мусобиқаҳои сатҳи ҷумҳуриявию байналмилалӣ ҳамоиши тантанавӣ доир гардид. Дар ин бора мутахассиси Раёсати кор бо ҷавонон ва варзиши шаҳри Душанбе Осим Муродзода ба АМИТ «Ховар» хабар дод.
Дар ҳамоиши мазкур сардори Раёсати кор бо ҷавонон ва варзиши шаҳри Душанбе Шоҳзод Раҳимзода ҷавонону варзишгарони пойтахтро бо ҷашни касбиашон табрик намуда, гуфт, ки баробари ба даст овардани Истиқлолияти давлатии Ҷумҳурии Тоҷикистон соҳаи тарбияи ҷисмонӣ ва варзиш дар маркази таваҷҷуҳи бевоситаи Президенти Ҷумҳурии Тоҷикистон муҳтарам Эмомалӣ Раҳмон қарор дорад.
«Варзиш на танҳо тарзи ҳаёти солим, балки масъулияти баланд ва дастоварди беназир барои ҳар фард, ҷомеа, миллат ва давлат буда, дар баробари дигар соҳаҳои ҳаёти мо он низ ҳамеша дар рушду такомул аст»,- гуфт Шоҳзод Раҳимзода.
Собиқадори соҳаи варзиш Мирзо Шамсиев ва аввалин гирандаи роҳхати бозиҳои олимпии Токио-2020 Шаббос Негматуллоев сухан карда, дастгириҳои бевоситаи Раиси шаҳри Душанбе муҳтарам Рустами Эмомалиро дар самти варзиш дар миқёси ҷумҳурӣ арзанда маънидод намуданд.
Дар анҷом ба хотири саҳми арзанда гузоштан дар рушди тарбияи ҷисмонӣ ва варзиш ва дастгириву ҳидоятҳо ҷиҳати самаранок ба роҳ мондани фаъолият дар самти омода намудани варзишгарони касбӣ собиқадорони соҳаи варзиш бо туҳфа ва ифтихорномаҳо қадрдонӣ гардиданд.
Ҳамчунин мураббиёну роҳбарияти мактабҳои варзишии шаҳри Душанбе барои саҳми назаррас дар корҳои ҷамъиятӣ, мусобиқаҳои варзишӣ ва мураббиёну дастпарварони муассисаҳои варзишӣ бо унвонҳои варзишӣ сарфароз гардонида шуданд.
АМИТ «Ховар»