Бахшида ба истиқболи Соли нави мелодии 2017 дар театрҳои шаҳри Душанбе намоишҳои солинавӣ ва афсонаҳо барои хурдсолон ба саҳна гузошта мешаванд.
Тавре аз Вазорати фарҳанги Ҷумҳурии Тоҷикистон хабар доданд, Театри давлатии академии опера ва балети ба номи С. Айнӣ тамошобини хурдсоли худро бо ду намоиш хурсанд хоҳад кард. Яке аз онҳо операи бачагонаи «Чароғи сеҳрноки Аловиддин»-и Шуҳрат Ашӯров ва дигаре афсонаи мусиқавии «Маликаи барфӣ»-и Г.Х Андерсон дар таҳияи Суҳроб Усмонов мебошад.
Театри давлатии академии драмавии ба номи Абулқосим Лоҳутӣ афсонаи «Найи сеҳрнок»-и Феликс Тошмуҳаммедовро, ки коргардон Асалбек Назриев саҳнавӣ кардааст, манзури хурдсолон менамояд. Намоиши «Суперхаргӯш», ки муаллиф ва коргардони ӯ ҳунарпешаи шинохта Хуршед Мустафоев аст, туҳфаи солинавии Театри давлатии драмавии русии ба номи Вл. Маяковский барои хурдсолону наврасон мебошад. Афсонаи мазкур дар кинотеатрҳои Тоҷикистон намоиш дода мешавад.
Ҳамчунин Театри давлатии ҷавонони Тоҷикистон ба номи М. Воҳидов барои ҳаводорони хурдсолу навраси худ намоиши «Афсунгар»-и Губаревро омода кардааст. Театри дӯстдоштаи хурдсолони пойтахт — Театри давлатии ҷумҳуриявии лӯхтак тамошобинони хурдсоли худро бо афсонаи «Ҷазираи беодам»-и Олга Журавлева ва коргардон Иззатулло Сафаров пешвоз хоҳад гирифт.
АМИТ «Ховар»