Аз рӯи натиҷаи озмуни ҷаҳонии «Сад макони беҳтарини сайёҳӣ», ки дар шаҳри Любляниеи кишвари Словения баргузор гардид, кӯҳҳои Помир ба номгӯи минтақаҳои тамошобоби сайёҳии ҷаҳон ворид гардиданд. Бояд зикр намуд, ки дар қаламрави собиқ Иттиҳоди Шӯравӣ ҳамагӣ ду мавзеъ- яке Юрмала дар кишвари Латвия ва дигаре кӯҳҳои Помири Тоҷикистон ба ин унвон сазовор гаштаанд. Директори иҷроияи Ассотсиатсияи сайёҳӣ, экологию фарҳангии Помир Асадшо Зоолшоев шароит ва имконоти Тоҷикистонро барои рушди соҳаи сайёҳӣ хеле мусоид шумурда, баён медорад, ки «агар ширкатҳои сайёҳии ватанӣ хизматрасониҳоро барои ҷаҳонгардон боз ҳам бештар бо меъёрҳои байналмилалӣ мутобиқ намоянд, кишвари мо метавонад аз ин соҳа даромади хуб ба даст орад. Соли гузашта бештар аз 400 ҳазор сайёҳ ба тамошои маконҳои зебову таърихии ҷумҳурӣ омаданд ва 10 ҳазори онҳо аз манзараҳои дилфиреби Вилояти Мухтори Кӯҳистони Бадахшон дидан намуданд».
Ин бори аввал нест, ки Тоҷикистон шомили рӯйхати чунин созмонҳои бонуфузи ҷаҳонӣ мешавад. Ҳамагӣ се соли пеш Боғи миллии Тоҷикистон ба рӯйхати мероси табиии умумиҷаҳонии ЮНЕСКО ворид карда шуд. Баъдан кӯҳҳои Помир, водии Вахон ва дараи Бартанг ба ин рӯйхат ворид шуданд. Роҳи мошингарди Душанбе-Кӯлоб-Дарвоз-Хоруғ-Мурғоб- Кулма яке баландтарин ва зеботарин роҳҳо дар дунё дониста шуд. Ҳамаи ин пешравӣ ва комёбӣ дар арсаи туризм аз ҳамкорӣ ва равобити хуби Кумитаи ҷавонон, варзиш ва сайёҳии ҷумҳурӣ бо ширкатҳои давлатию хусусӣ шаҳодат медиҳад. Яке аз дигар омилҳои пешрафти риштаи сайёҳӣ ба фазои амну осудаи кишвар робита мегирад. Агар мо ин фазоро ҳифз кунему тақвият бахшем, дар ояндаи начандон дур Тоҷикистон ба кишвари маъруфу шинохта барои мардуми сайёра табдил меёбад. Рушди инфрасохтор низ дар ҷалби таваҷҷуҳи сайёҳон нақши муассир дорад. Алъон дар баробари бунёди меҳмонхонаҳои замонавӣ, ҳамчунин дар деҳоти дуру наздики вилоят 80 хонаи меҳмондорӣ вуҷуд доранд. Роҳҳои мошингард низ сол аз сол ба меъёрҳои байналмилалӣ мутобиқ гардонида мешаванд.
/АМИТ «Ховар»/