Тибқи дастуру супоришҳои Ҳукумати Ҷумҳурии Тоҷикистон ва дар асоси нақшаи чорабиниҳои мақомоти иҷроияи ҳокимияти давлатии ноҳияи Тоҷикобод баҳри пешгирии шомилшавии ҷавонон ба ҳизбу ҳаракатҳои террористӣ-экстремистӣ ва баргардонидани шаҳрвандони гумроҳ аз давлатҳои ҷангзада ба ҷумҳурӣ вохӯрии намояндагони мақомоти иҷроия, мақомоти қудратӣ, аз ҷумла суд, прокуратура ва милитсия бо сокинони Ҷамоати деҳоти Мунаввар Шогадоев баргузор гардид. Дар ин бора масъулини ноҳияи Тоҷикобод ба хабарнигори минтақавии АМИТ «Ховар» иттилоъ доданд.
Дар ҷамъомади мазкур масъулин оид ба пешгирии шомилшавии ҷавонон ба ҳар гуна ҳизбу ҳаракатҳои иртиҷоӣ, машғул шудан ба таълимоти динии ғайрирасмӣ, сарчашмаҳои терроризм, экстремизм ва дигар зуҳуроти номатлуби ҷомеа, инчунин мазмун ва моҳияти қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи озодии виҷдон ва иттиҳодияҳои динӣ» ва дигар қонунҳои ҷорӣ сухан гуфтанд.
Инчунин зимни мулоқот масъалаи шомилшавии ҷавонон ба ҳар гуна ҳизбу ҳаракатҳои иртиҷоӣ мавриди баррасӣ қарор гирифта, раиси ноҳия Маҳмадшозода Ҳамидулло иброз намуд, ки сабаби асосии шомилшавии ҷавонон- ин паст будани сатҳи дониш, маърифат ва ҷаҳонбинии онҳо мебошад.
Аз ин рӯ ба сарварони муссисаҳои таълимӣ супориш дода шуд, ки пайваста бо хонандагон дар робита бошанд ва онҳоро дар рӯҳияи ватандӯстӣ тарбия намоянд. Аз шахсони барӯманди деҳа, падарон ва ходимони дин даъват ба амал оварда шуд, ки дар тарбияи фарзандон бетараф набошанд. Моҳияти Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд»-ро хуб дарк намуда, ба мардуми одӣ, махсусан ҷавонон онро фаҳмонанд. Зеро имрӯз тамоми нооромиҳо дар сайёра аз тарафи абарқудратон тавассути ҷавонони гумроҳ роҳандозӣ мегардад.
Бояд гуфт, ки Ҷамоати деҳоти Мунаввар Шогадоев яке аз ҷамоатҳои осебпазир ба шумор меравад. Тибқи иттилои масъулини мақомоти дахлдор, 11 нафар шаҳрвандони ҷамоати мазкур дар давлатҳои ҷангзада аъзои гурӯҳҳои терористӣ-экстремистӣ мебошанд. Дар ҷамъбасти вохӯрӣ волидайни шаҳрвандони гумроҳшуда дар бораи охирин тамос бо фарзандонашон иттилоъ дода, ваъда доданд, ки дар сурати пайдо шудани ягон маълумот дар ҳамкорӣ бо мақомоти қудратӣ баҳри пайдо ва баргардонидани онҳо аз давлатҳои ҷангзада мусоидат менамоянд.
АМИТ «Ховар»