Сохтмони биноҳои нави Маҷлиси Олӣ ва Ҳукумати Ҷумҳурии Тоҷикистон дар маркази шаҳри Душанбе ба зудӣ оғоз мешавад. Барои сохтмони ин ду бинои боҳашамат Ҷумҳурии Мардумии Чин дар ҳаҷми 1,5 миллиард юан баробар ба 220 миллион доллари ИМА кӯмаки бебозгашт ихтисос додааст. Дар ин бора раиси Кумитаи меъморӣ ва сохтмони назди Ҳукумати Ҷумҳурии Тоҷикистон Ҷамшед Аҳмадзода рӯзи ҷумъа, 17-уми июл, зимни нишасти матбуотӣ дар Маркази матбуоти ҷумҳуриявии АМИТ «Ховар» иттилоъ дод.
Ҳамзамон Ҷамшед Аҳмадзода тазаккур дод, ки бунёди ҳарду бино камаш чаҳор сол тӯл мекашад. «Биноҳо бисёр калонанд. Масоҳати ҳар кадомашон аз 42 то 44 ҳазор метри мураббаъ аст ва муҳлати сохтмонашон то се–чаҳор солро дар бар мегирад. Дар ҷараёни корҳо мо ба сифати онҳо аҳамияти зиёд хоҳем дод», — афзуд ӯ.
Ҷамшед Аҳмадзода изҳор дошт, ки мутахассисони ба Душанбе омада буданд, вале ба сабаби пандемияи коронавирус кор ба таъхир афтод. Бино ба гуфти Раиси Кумитаи меъморӣ ва сохтмон, дар бунёди биноҳои фавқуззикр муҳандисони чинӣ ҷалб мешаванд, вале мутобиқи созишнома 80 дарсад коргарон шаҳрвандони Тоҷикистон хоҳанд буд.
Хабар дода шуд, ки бинои нави Маҷлиси Олӣ дар хиёбони Рӯдакии пойтахт, дар ҷойи бинои собиқи Мақомоти иҷроияи Ҳокимияти давлатии шаҳри Душанбе ва Вазорати кишоварзии мамлакат қомат хоҳанд афрохт.
Баландии бинои нави Маҷлиси Олӣ 49,7 метр, баландии гунбази он 70 метрро ташкил дода, масоҳати умумии он 42 ҳазору 874 метри мураббаъро ташкил хоҳанд дод.
Бинои нави Ҳукумати мамлакат дар ҳудуди хиёбонҳои Рӯдакӣ ва Исмоили Сомонӣ дар майдони 10,27 гектар бунёд шуда, аз як бинои 15-ошёна барои дастгоҳи Ҳукумат ва ду бинои 13-ошёна барои идораҳои тобеи Ҳукумати Ҷумҳурии Тоҷикистон иборат хоҳад буд.
