1 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Шоҳмансури пойтахт сардхонаи ҶДММ “Маркази савдои деҳқон”-ро мавриди баҳрабардорӣ қарор дода, аз намоиши кишоварзӣ дидан намуданд.
Иншооти мазкур дар доираи омодагиҳо ба ҷашни 30-солагии Истиқлоли давлатии Ҷумҳурии Тоҷикистон аз ҷониби соҳибкори маҳаллӣ Фирӯза Масиева бунёд гардида, барои нигоҳдории маҳсулоти гуногуни кишоварзиву маводи ғизоӣ имконияти васеъ дорад.
Аз ҷумла, дар сардхона имконият аст, ки 2000 тонна сабзавоту мева ва 1000 тонна дигар намуди маҳсулоти ғизоӣ, ки ниёз ба нигоҳубини хос доранд, захира карда шаванд.
Дар сардхона дастгоҳу таҷҳизоти зарурӣ, ки ҳарорати дохили иншоотро мутобиқ ба меъёр нигоҳ дошта, сифати хуби маҳсулотро таъмин менамоянд, насб гардидаанд. Масоҳати умумии бино 3800 метри муррабаъро ташкил дода, дар он 25 нафар сокини маҳаллӣ соҳиби ҷойи кори доимӣ гардиданд.
Сардхонаи нав дорои анборҳои алоҳидаи нигоҳдории молу маҳсулот буда, ҳамчунин дар он барои кашонидани бор шароити мусоид фароҳам оварда шудааст.
Иттилоъ дода шуд, ки иншооти мазкур дар доираи дастуру ҳидоятҳои Сарвари давлат муҳтарам Эмомалӣ Раҳмон бунёд гардида, ин иқдом имконият медиҳад, ки дар ҳама фаслҳои сол бозорҳои шаҳри Душанбе бо маҳсулоти тару тозаи ватанӣ таъмин гарданд. Дар ин баробар, маҳсули дастранҷи деҳқонони мамлакат дар сардхона захира гардида, дар ҳолати афзоиши талабот ба дигар кишварҳо низ содирот мегардад.
Дар оянда иқтидори сардхона ба 4 ҳазор тонна расонида шуда, ҳамчунин дар дохили он сехи коркарди меваву истеҳсоли консерва ба роҳ монда мешавад, ки ба ин васила дар маҷмӯъ 45 нафар бо ҷойи кори доимӣ таъмин хоҳанд гашт.
Ҳоло дар шафати сардхона бо истифода аз шароиту имтиёзҳои фароҳамшуда соҳибкор сохтмони маркази хизматрасонии 4-ошёнаро идома медиҳад ва то анҷоми соли ҷорӣ бо тамоми шароити муосир бинои мазкур ба истифода дода мешавад.
Дар ҳудуди иншооти навбунёд ҳамзамон як толори намоишӣ бо масоҳати 600 метри мураббаъ бунёд ёфтааст.
Сарвари давлат муҳтарам Эмомалӣ Раҳмон дар ҳамин ҷо аз намоиши маҳсулоти кишоварзӣ дидан карданд. Дар намоишгоҳ асосан молу маҳсулоте, ки имконияти нигоҳубини онҳо дар сардхона мавҷуд аст, манзур карда шуд, ки аз анвои гуногуни маҳсулоти кишоварзӣ, аз ҷумла, навъҳои гуногуни ангур, тарбузу харбуза, бодирингу помидор, себу нок ва дигар номгӯи маҳсулот иборат буд.
Таъкид гардид, ки бо роҳандозии дурусти қоидаҳои агротехникӣ ҳамасола ҳаҷми истеҳсоли маҳсулоти кишоварзӣ дар мамлакат афзоиш ёфта, ҳамчунин дар заминаи қабули барномаҳои давлатӣ майдони боғу токзор васеъ мегардад. Ин раванд имконият фароҳам овард, ки талаботи бозори дохилии мамлакат бо маҳсулоти ғизоии ватанӣ қонеъ гардида, ҳамчунин содироти он ба кишварҳои мухталифи олам ба роҳ монда шавад.
Сарвари давлат муҳтарам Эмомалӣ Раҳмон зимни боздид иброз доштанд, ки дар вазъияти баамаломада, ки ҷомеаи ҷаҳониро дар ҳолати ногувор қарор додааст, рушди соҳаи кишоварзӣ, самаранок истифода бурдани ҳар порча замин ва гирифтани чанд ҳосил аз як замин омили асосии таъмини бозорҳои мамлакат бо маҳсулоти тару тоза ба шумор меравад. Масъулинро вазифадор карданд, ки барои захираи маҳсулоти кишоварзӣ аз фаъолияти чунин сардхонаҳои замонавӣ самаранок истифода бурда, дар дигар фаслҳои сол низ сабади истеъмолии шаҳрвандонро бо маҳсулоти хушсифати ватанӣ ғанӣ созанд.
АМИТ «Ховар»