Оғози сафари кории Пешвои миллат ба ноҳияи Данғара

Субҳи имрӯз Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бобати анҷоми сафари корӣ ба ноҳияи Данғараи вилояти Хатлон ташриф оварданд.

Дар фурудгоҳи ноҳияи Данғара Президенти Ҷумҳурии Тоҷикистон, муҳтарам Эмомалӣ Раҳмонро сокинони шукргузору ваҳдатсарои ноҳия бо самимияти баланд ва арҷгузорӣ ба хизматҳои шоёни ба нафъи давлату миллат анҷомдода, Сарвари давлатро истиқбол гирифтанд.

Пешвои миллат давоми ин сафар дар ифтитоҳи як қатор иншооти ҳаётан муҳими иқтисодиву иҷтимоӣ ширкат варзида, дар чорабинии Рӯзи дониш дар Донишгоҳи давлатии Данғара иштирок ва суханронӣ хоҳанд кард.