Бо талоши ғаввосони Раёсати Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар вилояти Суғд се нафар ғарқшуда дар обанбори «Баҳри Тоҷик» наҷот ёфтанд. Ҳодисаи мазкур 5 июли соли равон, тахминан соати 16:23 рух додааст. Дар ин бора аз Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба АМИТ «Ховар» хабар доданд.
Тибқи иттилои манбаъ, кормандони бахши наҷоти Раёсат, ки дар обанбори «Баҳри тоҷик»-и шаҳри Гулистон қисми навбатдорӣ ташкил намудаанд, 3 нафар шаҳрвандонро аз ғарқшавӣ наҷот доданд. Ду нафари онҳо ноболиғи 13-сола буда, сокинони шаҳри Хуҷанд мебошанд. Нафари сеюми наҷотёфта сокини деҳаи Роғи ҷамоати Палдораки ноҳияи Масчоҳ буда, 21 сол дорад.
Дар ҳамин ҳол аз ғарқи об ва ба ҳалокат расидани як сокини 22-сола дар дарёи Кофарниҳон хабар расид. Бино ба гуфтаи сардори шуъбаи Кумитаи ҳолатҳои фавқулодда ва мудофиаи гражданӣ дар ноҳияи Рӯдакӣ, нимаи рӯзи якшанбе, 5 июл як зодаи шаҳри Кӯлоб, ки ҳоло муваққатан дар хобгоҳи маҳалли Гипроземи шаҳри Душанбе истиқомат доштааст, ҳангоми оббозӣ дар қаламрави деҳаи Қарияи Камари ноҳияи Рӯдакӣ дар дарёи Кофарниҳон ғарқ шудааст.
Амалиёти ҷустуҷӯи ҷасади ғарқшуда то фаро расидани торикӣ идома дошт, вале он пайдо нашуд. Корҳои ҷустуҷӯӣ дар минтақа идома дорад.
Ёдовар мешавем, ки танҳо дар ду рӯзи охир хабари марги 4 нафар ва наҷоти ду нафар дар обҳои мамлакат расид, ки ин ташвишовар аст.
Тибқи иттилои масъулини Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, кормандони Кумита бо оғоз гардидани мавсими оббозӣ бо сокинони минтақаҳои гуногуни ҷумҳурӣ мулоқоту суҳбатҳо анҷом дода, ба онҳо қоида ва маконҳои оббозиро шарҳ медиҳанд. Онҳоро ҳушдор медиҳанд, ки аз оббозӣ дар ҷойҳои манъшуда худдорӣ намоянд.
«Аммо новобаста аз ҳушдорҳои қатъӣ сокинони ҷумҳурӣ дар чунин дарёҳо худсарона ба оббозӣ машғул шуда, ҳаёти худу наздиконашонро дар хатар мегузоранд. Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бори дигар аз сокинону меҳмонони ҷумҳурӣ эҳтиромона хоҳиш менамояд, ки ҳангоми оббозӣ қоидаҳои бехатариро риоя намуда, танҳо дар ҷойҳои муайяншуда ба шиноварӣ машғул шаванд. Ҳамчунин волидонро огоҳ менамояд, ки фарзандони худро ҳангоми ҳузур доштан дар лаби дарёву кӯлҳо беназорат нагузоранд. Хусусан имрӯзҳо, ки наврасон дар таътили тобистона қарор доранду бо гарм шудани ҳаво майли зиёд ба оббозӣ доранд, волидон ва масъулин уҳдадоранд, ки баҳри пешгирии чунин ҳолатҳо нохуш тадбирҳои судманд андешанд», — афзуд манбаъ.
АМИТ «Ховар»