Дар ноҳияи Бобоҷон Ғафуров корхонаи истеҳсоли собун ва хокаи ҷомашӯӣ ба истифода дода мешавад

Бахшида ба 30-солагии Истиқлолияти давлатии Ҷумҳурии Тоҷикистон ва нақшаи чорабиниҳои мақомоти иҷроияи ҳокимияти давлатии ноҳияи Бобоҷон Ғафуров, соли 2020 дар ноҳия бунёди 12 коргоҳи истеҳсоли маҳсулоти воридотивазкунанда дар назар аст. Аз ҷумла, то охири соли равон дар маркази ноҳия- Ҷамоати шаҳраки Ғафуров бо ибтикори ҶДММ «Озода косметик» корхонаи истеҳсоли собун ва хокаи ҷомашӯӣ ба истифода дода мешавад. То имрӯз ба коргоҳ хати муосири технологӣ ворид ва он насб гардида, ҳоло аз ҷониби мутахассисон корҳои таҷрибавии истеҳсолӣ ба роҳ монда шудаанд.

Тавре ба хабарнигори АМИТ «Ховар» дар Суғд аз шуъбаи энергетика ва саноати ҳукумати ноҳия хабар доданд, имрӯзҳо дар маркази ноҳия сохтмони боз ду коргоҳи нави саноатӣ — корхонаи коркарди ғалла ва истеҳсоли равған бо маром ҷараён дорад. Ин ду коргоҳ аз ҷониби ҶДММ “Хубҷамъ” дар масоҳати 5 гектар ба маблағи 120 миллион сомонӣ бунёд гардида истода, ҳоло корҳои сохтмонӣ дар арафаи анҷом қарор доранд.

Тибқи нақша, дар корхонаи коркарди ғалла дар як шабонарӯз то 500 тонна гандум коркард гардида, дар корхонаи истеҳсоли равған низ дар як шабонарӯз то 30 тонна маҳсулот истеҳсол карда мешавад.

Давоми шашмоҳаи аввали имсол дар ноҳия бо саҳми соҳибкорони маҳаллӣ 8 коргоҳи нави истеҳсолӣ бо 80 ҷойи корӣ мавриди баҳрабардорӣ қарор гирифта,  дар маҷмӯъ, дар давраи ҳисоботӣ аз ҷониби қариб сад коргоҳи саноатии ноҳия ба маблағи 948582,0 ҳазор сомонӣ маҳсулот истеҳсол гардид. Ҳамзамон суръати афзоиши истеҳсолот дар ин давра ба 169,9% баробар гардидааст.

АМИТ Ховар

Tags: